स्वरोजगार लघुवित्तको पूँजी वृद्धिको अनुपातमा EPS मा सन्तुलन

स्वरोजगार लघुवित्त वित्तीय संस्था लिमिटेड (SLBBL) को चुक्ता पूँजी ४०.४९ प्रतिशतले बढ्दा पनि लघुवित्तले सोही अनुपातमा नाफा बढाउँदा प्रतिसेयर आम्दानीमा सामान्य मात्र संकुचन आएको छ ।

सोमबार सार्वजनिक वित्तीय विवरण अनुसार कम्पनीले ९ करोड १ लाख रुपैयाँ खुद नाफा कमाएको छ । गत आवको यसै अवधिमा ६ करोड ६१ लाख रुपैयाँ खुद नाफा कमाएकोमा ३६.२४ प्रतिशतले बढेको हो ।

चुक्ता पूँजी ४०.४९ प्रतिशत बढेपछि ५१ करोड ४० लाख ९९ हजार पुगेको छ भने प्रतिसेयर आम्दानी १.०९ रुपैयाँ घटेर ३५.०८ रुपैयाँ छ ।

चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण अनुसार लघुवित्तले २ अर्ब ९१ करोड १० लाख निक्षेप संकलन र बैंक तथा वित्तीय संस्थाबाट ३ अर्ब ५२ करोड ८४ लाख सापटी लिएर ७ अर्ब ६ करोड ६४ लाख रुपैयाँ खुद ब्याज आम्दानी गरेको छ ।

समीक्षा अवधिमा लघुवित्तको जगेडा कोष ४.७५ प्रतिशत, निक्षेप संकलन ३०.७९ प्रतिशत, सापटी ७९.६९ प्रतिशत र कर्जा लगानी ४८.०८ प्रतिशत र खुद ब्याज आम्दानी ५७.१२ प्रतिशतले बढेको छ ।

वित्तीय विवरण अनुसार लघुवित्तले २१ करोड ३३ लाख ५ हजार रुपैयाँ खुद ब्याज आम्दानी र १२ करोड ७४ लाख १९ हजार सञ्चालन नाफा कमाएको छ । खुद ब्याज आम्दानी र सञ्चालन मुनाफा बढेसँगै लघुवित्तको खुद नाफा बढ्न पुगेको हो । गत आवको यसै अवधिमा सञ्चालन मुनाफा १० करोड ६७ लाख ऋणात्मक थियो ।

लघुवित्तको खराब कर्जा अनुपात केही बढेर २.९२ प्रतिशत पुगेको छ । खराब कर्जा बढेसँगै लघुवित्तले सम्भावित जोखिम बापत १ करोड ८६ लाख रुपैयाँ छुट्याएको छ ।

यस अवधिसम्ममा लघुवित्तको प्रतिसेयर नेटवर्थ १३५.७० रुपैयाँ र मूल्य आम्दानी अनुपात ३५.४६ गुणा छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।