सानिमा बैंकको लाभांश पारित, उपयुक्त संस्थासँग गाभ्न/गाभिन सञ्चालक समितिलाई अख्तियारी

सानिमा बैंकले यहि असोज २९ गते बुधबार नक्साल ब्यांकेट, नारायणचौर, नक्सालमा सम्पन्न पन्ध्रौ वार्षिक साधारणसभाले गत आर्थिक बर्षको मुनाफाबाट प्रस्ताव गरेको लाभांश लगायतका विभिन्न एजेण्डा पारित गरेको छ ।

बैंकका अध्यक्ष विनय कुमार श्रेष्ठको अध्यक्षतामा भएको उक्त सभाले प्रस्तावित लाभांश पारित गरेको हो । गत आर्थिक वर्ष २०७५/७६ को मुनाफाबाट शेयरधनीलाई १० प्रतिशत बोनस शेयर र बोनसमा लाग्ने कर सहित ११.०५२६ प्रतिशत नगद लाभांश गरी कुल २१.०५२६ प्रतिशत लाभांश वितरण गर्ने प्रस्ताव गरेको थियो ।

बैंकले ८० करोड १ लाख २५ हजार ५४४ रुपैयाँ बराबरको बोनस र ८८ करोड ४३ लाख ४९ हजार २८५.४७ रुपैयाँ बराबरको नगद लाभांश वितरण गर्नेछ । साधारण सभाबाट पारित लाभांश असोज १२ गतेसम्म कायम बैंकका शेयरधनीहरुले मात्र पाउनेछन् । बैंकले साधारणसभा प्रयोजनको लागि असोज १३ गते बुकक्लोज गरेको थियो ।

त्यसैगरी बैंकले उपयुक्त बैंक तथा वित्तीय संस्थालाई आफुमा गाभ्न तथा मर्जर प्रकृयाको लागि सहमति वा सम्झौता गर्न तथा मर्जर सम्बन्धि सम्पुर्ण प्रकृयाको लागि सञ्चालक समितिलाई अख्तियारी प्रदान गरेको छ । साधारणसभाबाट बैंकको गत आर्थिक वर्षको वार्षिक प्रतिवेदन, वार्षिक वित्तीय विवरण, एकीकृत वित्तीय विवरणलगायत महत्वपूर्ण प्रतिवेदनहरु पनि पारित गराएको छ ।

हाल ८ अर्ब १२ लाख चुक्ता पूँजी रहेको बैंकको ८० करोड १ लाख रुपैयाँको बोनस वितरणपश्चात चुक्ता पूँजी ८ अर्ब ८० करोड १३ लाख रुपैयाँ पुग्नेछ ।

आर्थिक वर्ष २०७५/७६ मा सानिमा बैंकले २ अर्ब २६ करोड खुद मुनाफा गरेको थियो । बैंकको गत असारमसान्तसम्ममा कुल सम्पत्ति १०९.०६ अर्व, कुल निक्षेप ९२.२८ अर्व तथा खुद कर्जा सापटी ८३.४४ अर्ब रहेको छ ।

आर्थिक वर्ष २०७४/७५ को तुलनामा खुद मुनाफा, निक्षेप, कर्जा सापटी र कुल सम्पत्तिमा क्रमश ३३.०२, १६.५४, २०.५०, र १८.७८ प्रतिशतले वृद्धि गरेको थियो।