सर्लाही भन्सार राजश्व लक्ष्य भेट्न असफल, गत आवमा ५३ करोड मात्र सङ्कलन

जिल्ला भन्सार कार्यालय सर्लाहीले आर्थिक वर्ष २०७८/७९ मा राजश्व लक्ष्य भेट्टाउन असफल भएको छ । गत आवमा कार्यालयले लक्ष्यको ८२.२२ प्रतिशत मात्र राजश्व संकलन गरेको हो । कार्यालयले गत आर्थिक वर्षमा करिब ५२ करोड ८२ लाख रुपैयाँ राजस्व सङ्कलन गरेको छ । कार्यालयले ६४ करोड २४ लाख ६१ हजार रुपैयाँ राजस्व सङ्कलन गर्ने लक्ष्य लिएको थियो ।

जिल्ला भन्सार कार्यालयका कार्यालय प्रमुख मुरारीप्रसाद काफ्लेका अनुसार कार्यालयले आर्थिक वर्ष २०७८/७९ को कुल लक्ष्यको ८२ प्रतिशत बराबर प्रगति गरेको हो । कोरोना महामारी, स्थानीय निकायको निर्वाचन आदिका कारण अझै राजस्व सङ्कलनमा अपेक्षा गरे अनुसारको प्रगति हासिल गर्न नपाएको कार्यालय प्रमुख काफ्लेले बताए ।

उनले कोरोना महामारीका कारण सीमानाका बन्द हुनु, स्थानीय निकायको निर्वाचनको प्रभाव पर्नु र छिमेकी देश भारतमा पनि भएको निर्वाचनको प्रभावका कारण अपेक्षाअनुसार राजस्व सङ्कलन गर्न नपाएको बताए ।

जिल्लामा छोटी भन्सार कार्यालय र मुख्य भन्सार कार्यालय सहित आठ वटा भन्सार कार्यालय रहेका भए पनि जिल्लाका दुई छोटी भन्सार कार्यालय मात्र सञ्चालन हुनु, कोरोना महामारीका कारण सीमानाका बन्द हुनु, स्थानीय निकाय निर्वाचनको प्रभाव पर्नु र भारतमा भएको निर्वाचनको प्रभावले अपेक्षा अनुरुप राजस्व सङ्कलन हुन नसकेको कार्यालयले जनाएको छ ।

जिल्लाबाट निकासी पैठारी, लिलामी र अस्थायी पैठारी लगायतका कामबाट आव २०७८/७९ मा ५२ करोड ८२ लाख रुपैयाँ राजस्व सङ्कलन भएको कार्यालयले जनाएको छ । भन्सार कार्यालयले आव २०७८/७९ को साउनमा ३९ करोड ३३ लाख, भदौमा ५४ करोड ६१ लाख, असोजमा ५१ करोड ६३ लाख, कात्तिकमा ४६ करोड ८१ लाख, मङ्सिरमा ६३ करोड १९ लाख, पुसमा ६२ करोड ४४ लाख, माघमा ५४ करोड ५० लाख, फागुनमा ३५ करोड ६४ लाख र चैतमा २७ करोड ९२ लाख रुपैयाँ राजस्व सङ्कलन गरेको छ ।

त्यसैगरी वैशाखमा ३५ करोड ३१ लख रुपैयाँ, जेठमा २८ करोड ३७ लाख र असारमा २८ करोड ४१ लाख रुपैयाँ राजस्व सङ्कलन गरेको कार्यालय प्रमुख काफ्लेले जानकारी दिए । जिल्ला भन्सार कार्यालयले आव २०७७/७८ मा ६० करोड ५९ लाख र आव २०७६/७७ मा ३३ करोड ६६ लाख रुपैयाँ राजस्व सङ्कलन गरेको थियो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।