साधारण सभा समयमा गर्न नसकेको नेशनल हाइड्रोको विशेष साधारण सभा पनि सर्यो


आन्तरिक विवादका कारण नेशनल हाइड्रो निर्धारित समयमा साधारण सभा गर्न नसक्ने कम्पनीको पहिचान बनाउने अवस्थामा पुगेको छ ।

अधिकांश वर्षहरुमा आन्तरिक विवादका कारण सहज अवस्थामा साधारण सभा गराउन नसकेको हाइड्रोको विशेष साधारण सभा पनि निर्धारित मितिमा सम्पन्न हुन नसकेको हो ।

यस अघि फागुन ३० गते बोलाएको साधारण सभा पनि कोरम नपुगेकै कारण स्थगित भएको थियो । पछि चैत्र ११ गते कम्पनीले साधारण सभा सम्पन्न गरेको थियो ।

कम्पनीले भदौ १० गते शुक्रबार विशेष साधारण सभा बोलाएकोमा गणपुरक संख्या नपुगेपछि सभा स्थगित भएको थियो । सो लगत्तै कम्पनी सञ्चालक समितिले भदौ १७ गते विशेष साधारण सभा बोलाएको छ ।

अघिल्लो आर्थिक वर्षको बोनस बितरण तथा सुनकोसी हाइड्रो पावर कम्पनी लिमिटेडलाई प्राप्ति गरे पछि कायम हुने एकीकृत चुक्ता पुँजीको ५० प्रतिशत हकप्रद निष्काशनको प्रस्ताव विशेष साधारण सभाबाट पारित गराउँदैछ ।

सुनकोशी हाइड्रोपावरलाई प्रतिसेयर २५ रुपैयाँका दरले प्राप्ति गरेको हो । अघिल्लो आर्थिक वर्षमा कम्पनीले १९.५० प्रतिशत बोनस सेयर बितरण गरेको थियो । सुनकोशी प्राप्ति तथा बोनस सेयर बितरण पश्चात कम्पनीको चुक्ता पुँजी १ अर्ब ६४ करोड रुपैंया कायम भएको छ । कम्पनीले उक्त पुँजीको ५० प्रतिशतले हुने ५७ करोड रुपैंया बराबरको हकप्रद निष्काशन गर्न लागेको हो ।

भदौ १७ गते बालुवाटारस्थित डेलिश ओपरा रेष्ट्रो एण्ड बैंक्वेटमा ११ बजे बोलाइएको साधारण सभाले सय रुपैयाँ अंकित मूल्यका २२ हजार ४ सय ७० कित्ता साधारण सेयर व्यवस्थापन गर्न सञ्चालक समितिलाई अख्तियारी दिनेछ ।

कम्पनीले विशेष साधारण सभा प्रयोजनका लागि भदौ २ गते एक दिन बुक क्लोज गर्नेछ । जसअनुसार भदौ १ गतेसम्म कायम सेयरधनीहरुले मात्र कम्पनीको विशेष साधारण सभामा भाग लिन पाउनेछन् ।

कम्पनीले सिन्धुपाल्चोकमा ७.५ मेगावाटको इन्द्रावती तेस्रो जलविद्युत आयोजना सञ्चालन गरिरहेको छ भने भोजपुरमा सहायक कम्पनीमार्फत १४.१५ मेगावाटको तल्लो इर्खुवा जलविद्युत आयोजना निर्माण गरिरहेको छ ।

समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।