श्रृजनशील लघुवित्तको आईपीओ १३ लाखले भरे, ३९ गुणा बढी आवेदन

श्रृजनशील लघुवित्त वित्तीय संस्था लिमिटेडको प्रारम्भिक सार्वजनिक निष्काशन (आईपीओ) मा तीन दिनमा १३ लाख बढी आवेदकबाट ३९ गुणा बढी आवेदन परेको छ ।

सिडिएस एण्ड क्लियरिङ्ग लिमिटेडका अनुसार शुक्रबार दिउँसो साढे १ बजेसम्म १३ लाख ४ हजार २०५ वटा आवेदनबाट १ अर्ब ४४ करोड ८० लाख ३७ हजार रुपैयाँ मूल्यको १ करोड ४४ लाख ८० हजार ३७० कित्ताको माग परेको हो ।

उल्लेखित संख्या सर्वसाधारणबाट माग भएको सेयर संख्याको ३९.२९ गुणा बढी हो । कम्पनीले कर्मचारी र सामुहिक लगानी कोषलाई सुरक्षित गरी सर्वसाधारण लगानीकर्ताबाट ३ लाख ६८ हजार ५९० कित्ता सेयर खरिदका लागि आह्वान गरेको थियो ।

भदाै १५ गते बुधबारदेखि बिक्री खुला भएको उक्त आईपीओमा लगानीकर्ताले भदौ १९ गते आइतबारसम्म आवेदन दिन सक्नेछन् । आईपीओमा न्यूनतम १० कित्तादेखि १ हजार कित्तासम्मका लागि आवेदन दिने व्यवस्था भएपनि गोलाप्रथाबाट सेयर वितरण गर्नुपर्ने अवस्थाका कारण १० कित्ताका लागि आवेदन दिनु नै उपयुक्त हुने देखिन्छ ।

इच्छुक लगानीकर्ताले मेरो सेयर एप, वेबसाइट तथा नेपाल धितोपत्र बोर्डबाट सि–आस्वा सदस्यता लिएका सम्पूर्ण बैंक तथा वित्तीय संस्था र तिनका शाखा कार्यालयहरुबाट आईपीओमा आवेदन दिन सक्नेछन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।