गत आवको नाफाबाट एक दर्जन कम्पनीले घोषणा गरे लाभांश

गत आर्थिक वर्षको नाफाबाट एक दर्जन कम्पनीले लाभांश घोषणा गरेका छन् ।

हालसम्म सबैभन्दा धेरै ९ वटा म्युचुअल फण्डले लाभांश घाेषणा गरेका छन् । यस्तै दुई क्यापिटल र एक हाइड्रोपावर कम्पनीले लाभांश वितरणको प्रस्ताव गरेका छन् ।

गत आवबाट लाभांश प्रस्ताव गरेकामध्ये सानिमा माई हाइड्रोपावर इक्वीटी मार्केटमा सबैभन्दा पहिलाे लाभांश प्रस्ताव गर्ने कम्पनी हो । कम्पनीले कर सहित कुल ५.२६ प्रतिशत लाभांश वितरणको प्रस्ताव गरेको छ ।

त्यसभन्दा अघि ९ म्युचुअल फण्डले लाभांश प्रस्ताव गरिसकेका छन् । एनएमबि क्यापिटलको योजना व्यवस्थापनमा सञ्चालित दुबै फण्डले गत आवबाट सर्वाधिक २१.०५ प्रतिशतका दरले प्रतिफल (नगद लाभांश) वितरणको प्रस्ताव गरेका छन् । सबैभन्दा कम एनआईबिएल प्रगति फण्डले चुक्ता पुँजीको ४.२० प्रतिशत प्रतिफल वितरण गरेको छ ।

दुई क्यापिटलमा एनआईसी एशिया बैंकको पूर्ण स्वामित्व रहेको एनआईसी एशिया क्यापिटलले चुक्ता पुँजीको ५५ प्रतिशत नगद लाभांश वितरण गरेको छ भने कुमारी बैंकको पूर्ण स्वामित्व रहेको कुमारी क्यापिटलले चुक्ता पुँजीको ५ प्रतिशत मात्र वितरण गरेको छ ।

यता एशियन लाइफ इन्स्योरेन्स कम्पनीले अघिल्लो आर्थिक वर्ष २०७७/७८ बाट चुक्ता पुँजीको १४.५० प्रतिशत बोनस सेयर र ०.७५ प्रतिशत नगद लाभांश वितरणको प्रस्ताव गरेको छ ।

लाभांश प्रस्ताव गरेमध्ये सनराइज फस्ट म्युचुअल फण्ड, एनआईबिएल प्रगति फण्डको लाभांश पाउन भदौ २८ गतेसम्म इकाईधनी हुनुपर्छ भने एशियन लाइफ इन्स्योरेन्सको लाभांश पाउन असोज १२ गतेसम्म र सानिमा माई हाइड्रोपावरको लाभांश कार्तिक १ गतेसम्म कायम रहने लगानीकर्ताले मात्र पाउनेछन् ।

? समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।