खाद्य व्यवस्था तथा व्यापार कम्पनीले आजदेखि थाल्यो ४१ जिल्लाको ४५ स्थानमा सुपथ मूल्य पसल

सरकारी स्वामित्वमा रहेको  खाद्य व्यवस्था तथा व्यापार कम्पनीले आजदेखि ४१ जिल्लाका ४५ स्थानमा चाडपर्व लक्षित सुपथ पसल सञ्चालनामा ल्याएको छ ।

खाद्यले उपत्यकामा थापाथली, रामशाहपथ, नख्खु र भक्तपुरमा गरी चार स्थान सहित कुल देशभरका ४५ स्थानमा रहेका बिक्री केन्द्रबाट सुपथ मूल्यमा खाद्यान्न वितरण थालेकाे हाे । असोज १ गतेदेखि सञ्चालन भएको उक्त सुपथ पसल कात्तिक २४ गतेसम्म सञ्चालन हुनेछ ।

उद्योग वाणिज्य तथा आपूर्तिमन्त्री दिलेन्द्रप्रसाद बडूले खाद्य व्यवस्था तथा व्यापार कम्पनीको थापाथली स्थित कार्यालयमा एक कार्यक्रमका बीच सुपथ मूल्य पसलको सुरुवात गरेका छन् । अन्य जिल्लामा सम्बन्त्रीत जिल्लाको प्रमुख जिल्ला अधिकारीबाट सुपथ मूल्यको थालनी गरिएको कम्पनीले जनाएको छ ।

चाडपर्वमा खाद्यान्न लगायत दैनिक उपभोग्य वस्तुको खपत बढी हुने हुँदा उपभोक्तालाई राहत दिन सरकारले चाडपर्वको अवसरमा हरेक वर्ष दशैँ, तिहार र छठ पर्वका बेला सुपथ मूल्य पसल सञ्चालन गर्दै आएको छ ।

खाद्य व्यवस्था तथा ब्यापार कम्पनीका अनुसार सुपथ मूल्य पसलमा जुम्लाको सिमी, गेडागुडीमा प्रतिकेजी १० रुपैयाँ छुट दिइएको छ ।

यस्तै चामल, दाल, आटा, पिठो, मैदा, तेल, चिउरामा प्रतिकेजी ७ रुपैयाँ र नुनमा प्रतिकेजी २ रुपैयाँ छुट दिएको छ । यस्तै खाद्यबाट वितरण हुने डीडीसी घिउ प्रतिकेजीमा ६० रुपैयाँ, पनिर र चिज प्रतिकेजीमा २० रुपैयाँ र दही प्रतिकेजीमा १० रुपैयाँ छुट दिइएको छ ।

खाद्य व्यवस्था तथा व्यापार कम्पनी लिमिटेडले यो वर्ष काठमाडौं उपत्यकाभित्र अनलाईन मार्फत खाद्यान्नको निःशुल्क डेलिभरी समेत दिने भएको छ । हाललाई उपत्यकाको चक्रपथ भित्र र चक्रपथ बाहिर १ किलोमिटर मोटर बाटो भएको स्थानसम्म मात्र खाद्यान्न डेलिभरी दिनेछ । खाद्यान्न अर्डर कन्फर्म गरेको १ दिनभित्र डेलिभरी दिइसक्ने कम्पनीले जनाएको छ । एक ग्राहकले कम्तिमा २ हजार रुपैयाँदेखि बढीमा १५ हजार रुपैयाँसम्मको अर्डर गर्न सक्नेछन् ।

चाडपर्वमा उपभोक्तालाई राहत दिनका लागि खाद्य व्यवस्था तथा व्यापार कम्पनीका अलवा साल्ट ट्रेडिङ कर्पोरेसन र दुग्ध विकास संस्थान (डीडीसी) ले पनि संयुक्त रूपमा सुपथ पसल सञ्चालनमा ल्याउनेछन् । चाडपर्वमा उपभोक्तलाई सहुलियत दिन खाद्य कम्पनीलाई दुई करोड ३२ लाख र साल्ट्र ट्रेडिङ कर्पोरेसनलाई एक करोड रुपैयाँ छुट्याएको मन्त्रालयले जनाएको छ । उपभोक्तालाई छुट दिएबापतको रकम जति हुन्छ, त्यति सरकारले शोधभर्ना बापत उपलब्ध गराउने गर्छ ।

तीन हजार खसीबोका ल्याइने,प्रतिकेजी १० रुपैयाँ छुट दिने 

हरेक वर्ष दशैँमा जस्तै यो वर्ष पनि सरकारी स्वामित्वमा रहेको खाद्य व्यवस्था तथा व्यापार कम्पनीले दशैँका लागि दुई हजार खसीबोका र एक हजार च्याङ्ग्रा ल्याउने भएको छ ।

कम्पनीले तीन हजार खसीबोका र च्याङ्ग्रा खरिद गरेर बजार मूल्यभन्दा सस्तो मूल्यमा उपभोक्तालाई उपलब्ध गराउने भएको हो । दशैँमा बजारमा खसीबोकाको खपत धेरै हुने हुँदा बजार मूल्य नियन्त्रण गर्न खाद्य कम्पनीले खसीबोका ल्याउन लागेको कम्पनीले जनाएको छ ।

दशैँमा उपत्यकामा खसीबोकाको खपत धेरै हुन्छ, निजी व्यवसायीले मनपरी मूल्य निर्धारण गर्न सक्ने हुँदा बजार मूल्य हस्तक्षेप गरी उपभोक्तालाई सुपथ मूल्यमा उपलब्ध गराउन खसीबोका खरिद गर्न लागिएको हो ।

उपभोक्तालाई राहत तथा बजार हस्तक्षेपका लागि खसीबोका र च्याङ्ग्रामा प्रतिकेजी १० रुपैयाँ छुट दिने भएको छ । यसका लागि ६ करोड ४५ लाख रुपैयाँ बजेट विनियोजन गरिएको कम्पनीका नायब महाप्रबन्धक श्री मणिराज खनालले जानकारी दिए ।

खाद्यले हरेक वर्षको दशैंमा प्रत्येक वर्ष विभिन्न जिल्लाबाट खसीबोका खरिद गरी काठमाडौँमा ल्याएर खसीबोका र च्याङ्ग्रा बेच्दै आएको छ ।

? समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।