जाल्पाको बम्पर लाभांशले उचाल्यो सेयर बजार, इन्डेक्स दुई हजार बिन्दुतर्फ

जाल्पा लघुवित्तले गत आर्थिक वर्षको नाफाबाट सेयरधनीलाई बम्पर लाभांश वितरण गर्ने प्रस्ताव गरेसँगै आइतबार लघुवित्तको उपसमुहगत सूचकमा तीव्रत्तर बढोत्तरी आउँदा सेयर बजारमा उत्साह फर्किएको छ ।

लघुवित्तले चुक्ता पुँजीको ७३ प्रतिशत बोनस सेयर र कर प्रयोजनसहित ३.८४२१ प्रतिशत नगद लाभांश वितरण गर्ने प्रस्वातका कारण वितरणयोग्य नाफा धेरै आर्जन गरेका अन्य लघुवित्तले पनि सोही अनुसार लाभांश आउने आशामा उक्त उपसमुहगत सूचक सबै उच्च बढेको हो । जाल्पा गत आव २०७८/७९ बाट लाभांश वितरण गर्ने पहिलो लघुवित्त पनि हो । लघुवित्तहरुको आगामी प्रस्तावित लाभांश पनि राम्रो आउने विश्वासका साथ लगानीकर्ताहरुले इन्डेक्सको मतलव नगरी लाभांशमा आधारित भएर लगानी बढाएको देखिन्छ ।

एउटा लघुवित्तको बम्पर लाभांश घोषणले सेयर बजारमा उत्प्रेरकको काम गरेको अनुभव बजारका लगानीकर्तामा छ । एक हजार ८०० बिन्दुमा झरेको बजार करिब २ हजारको बिन्दुतर्फ अगाडि बढेको छ ।

आइतबार लघुवित्त मात्र होइन थोरै बजार पुँजीकरण भएका फाइनान्स र अन्यको उपसमुहगत सुचक पनि ४ प्रतिशत धेरैले वृद्धि भएको छ । यस्तै उत्पादन तथा प्रशोधनमुलक र जलविद्युत उपसमुहगत सूचक पनि ३ प्रतिशत अधिक बढेका छन् । म्युचुअल फन्डको सूचक ०.०५ अंकले ऋणात्मक बनेको छ ।

थोरै पुँजी भई गत आवमा उच्च नाफा आर्जन गर्न सफल भएका कम्पनीले धेरै लाभांश दिनसक्ने विश्वासका साथ बजारमा लगानीकर्ताहरुले लगानी वृद्धि गरेको देखिन्छ । यसले कारोबार डेढ अर्बमाथि पुगेको छ । तर बजारप्रति लगानीकर्ताले गरेको यो विश्वास ‘एक्सपेक्टेसन भर्सेस रियालिटी’ अर्थात आंकाक्षा र वास्तविकतामा भने फरक पर्न पनि सक्नेछ ।

एउटा कम्पनीले दिएको लाभांशका आधारमा सबै कम्पनीले सोही अनुसार नै लाभांश वितरण गर्ने नगर्ने सो कम्पनीको सञ्चालक समितिको निर्णमा निर्भर हुने र बजार बढेको बेला लाभांश क्षमता नभएका तर कम पुँजी भएका कम्पनीको सेयरमूल्यमा पनि सोही अनुसार वृद्धि भएको हुनसक्नेतर्फ सचेत भई लगानी रणनीति बनाउनुपर्ने जानकारहरु बताउँछन् ।

आइतबार देखिएको उत्साहकै कारण बजार सूचक ४३.२० अंकले बढेर १९६५.३६ बिन्दुमा पुगेको छ । ठूला कम्पनीहरुको कारोबार सूचक मापक सेन्सेटिभ इन्डेक्स पनि ८.०९ अंकले बढेर ३८७.५२ बिन्दुमा पुगेको छ । यसदिन १ अर्ब ५४ करोड ८० लाख ३२ हजार ५६१ रुपैयाँ बराबरको सेयर खरिद बिक्री भएका छन् । २२८ कम्पनीको ३९ लाख १३ हजार ५७३ कित्ता सेयर २७ हजार ७६८ वटा संख्यामा खरिद बिक्री भएका छन् । आइतबारको वृद्धिपछि सेयर बजारको कुल बजार पुँजीकरण २८ खर्ब २६ अर्ब ९३ करोड रुपैयाँ कायम भएको छ ।

आइतबार नेष्डो समृद्ध लघुवित्तको सर्वाधिक १० करोड १४ लाख ९६ हजार रुपैयाँ बराबरको कारोबार भएको छ । एभरेष्ट बैंकको ७ करोड ९ लाख, हिमाल दोलखा हाइड्रोपावर ६ करोड ७५ लाख, जाल्पा लघुवित्तको ५ करोड ६६ लाख रुपैयाँ बराबरको १६ हजार ६२५ कित्ता सेयर, शिवम् सिमेन्टस् ४ करोड ४४ लाख, मेरो माइक्रोफाइनान्स संस्थापक ३ करोड ८९ लाख, नबिल बैंक ३ करोड ८२ लाख, नेपाल पुनर्बीमा कम्पनी ३ करोड ५४ लाख र फरवार्ड लघुवित्तको ३ करोड २० लाख रुपैयाँको सेयर कारोबारमा आएको छ ।

आइतबार पाँच लघुवित्त कम्पनीको सेयरमूल्य बढेर सकारात्मक सर्किट लागेको छ । यसदिन जाल्पा, मानुषी, नेष्डो समृद्ध, उपकार र उन्नति सहकार्य लघुवित्तको सेयरमूल्यमा सकारात्मक सर्किट लागेको हो । सर्किटपछि जाल्पाको सेयरमूल्य ३४०८.९० रुपैयाँ, मानुषीको ११६९.३०, नेष्डो समृद्धको ३१७३.५०, उपकारको ३६३९.६० र उन्नति सहकार्यको ८५४ रुपैयाँ पुगेको छ । यस्तै स्वेतगंगा हाइड्रोपावरको सेयर ९.५२ प्रतिशत, मनकामना स्मार्ट लघुवित्त ९.५१, विन लघुवित्त ८.७०, राष्ट्र उत्थान लघुवित्त ८.३९ र जीवन विकास लघुवित्तको सेयरमूल्य पनि ७.९८ प्रतिशतले वृद्धि भएको छ ।

आजको बजारमा हिमालयन एभरेष्ट इन्स्योरेन्सका संस्थापक सेयरका लगानीकर्ताले सर्वाधिक ३.४८ प्रतिशतका दरले गुमाएका छन् । ८.९० रुपैयाँ सेयरमूल्य घटेसँगै कम्पनीको संस्थापक सेयरको भाउ २४७ रुपैयाँमा झरेको छ । यस्तै नबिल इक्वीटी फन्ड र आरबिबि म्युचुअल फन्डका इकाई लगानीकर्ताले २प्रतिशत बढीले सेयरको भाउ घटेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।