सामलिङ पावरको सेयर कारोबार रोक्का गर्दै नेप्सेले सोध्यो ७२ घण्टे स्पष्टिकरण

सामलिङ पावर कम्पनीको धितोपत्रको दोस्रो बजारमा हुने सेयर कारोबार रोक्का गर्दै नेपाल स्टक एक्सचेञ्ज (नेप्से) ले कम्पनीसँग ७२ घण्टे स्पष्टिकरण मागेको छ ।

कम्पनीले लाभांश प्रस्तावको सूचनामा समयमा नै उपलब्ध नगराएको भन्दै नेप्सेले कम्पनीको सेयर कारोबार रोक्का राख्दै ३ दिनभित्र स्पष्टिकरण पेश गर्न निर्देशन दिएको छ ।

नेप्सेले धितोपत्र सूचीकरण विनियमावली, २०७५ विपरीत कार्य गरेको भन्दै सामलिङ पावरको सेयर कारोबार रोक्का गर्दै चित्तबुझ्दो स्पष्टीकरण पेस गर्न पनि निर्देशन दिएको हो ।

कम्पनीले मंसिर २१ गते बुधबार बिहान ९ः३० बजे सञ्चालक समितिको बैठक बसेर सेयरधनीहरुलाई गत आव २०७८।७९ को लागि कुनै पनि लाभांश प्रस्ताव नगर्ने निर्णय गरेको हो । सो सूचना नेप्सेमा मंसिर २१ गते कार्यालय समय सकिएपछि दिउँसो ३ः४२ बजे मात्रै कम्पनीले जानकारी दिएकाले कम्पनीको सेयर कारोबार रोक्का राखेर स्पष्टिकरण मागिएको हो ।

सेयरमूल्यमा प्रभाव पर्ने लगायतका अति संवेदनिशिल प्रकृतिका कुनै पनि निर्णय गर्दा कम्पनीले निर्णय हुने वित्तिकै तथा भोलिपल्ट कारोबार समय अगावै नेप्सेमा सार्वजनिक जानकारीमा ल्याउनुपर्ने प्रावधान रहेको छ । तर कम्पनीले उक्त व्यवस्था लत्याएको हो ।

नेप्सेले कम्पनीले के कति कारणबाट नेप्सेमा समयमा नै जानकारी नदिइएको हो, यो पत्र प्राप्त भएको मितिले ३ दिनभित्र स्पष्टिकरण पेश गर्न समेत निर्देशन दिएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।