निफ्राको ऋणपत्रमा आवेदन दिने आज अन्तिम दिन

नेपाल इन्फ्रास्ट्रक्चर बैंकले निष्काशन गरेको उर्जा ऋणपत्रमा आवेदन दिने आज (पुस १४ गते) अन्तिम रहेको छ।

बैंकले मंसिर २९ गते बिहीबारदेखि पाँच अर्ब मूल्यको बराबरको ‘निफ्रा उर्जा ऋणपत्र ७ प्रतिशत २०८५/८६’ नामक ऋणपत्र निष्काशन गरेको छ ।

वार्षिक ७ प्रतिशत ब्याजदरमा बैंकले ७ वर्ष अवधिको उक्त ऋणपत्र निष्काशन गरेको हो ।

प्रतिइकाई एक हजार अंकित दरका ५० लाख कित्ता ऋणपत्रमध्ये ४० प्रतिशत अर्थात २ अर्ब रुपैयाँ बराबरको २० लाख कित्ता सर्वसाधारणमा बिक्रीमा आएको छ । सर्वसाधारणका लागि निष्काशन गरिएको ऋणपत्रमध्ये ५ प्रतिशत अर्थात १ लाख कित्ता ऋणपत्र सामूहिक लगानी कोषहरुका लागि छुट्याइएको छ । ६० प्रतिशत अर्थात ३ अर्ब रुपैयाँ बराबरको ३० लाख कित्ता भने बैंकले व्यक्तिगत तवरबाट बिक्री गर्नेछ ।

बैंकको ऋणपत्रमा लगानी गर्नेले न्यूनतम २५ कित्तादेखि अधिकतममा १ लाख कित्तासम्मका लागि आवेदन दिन सक्नेछन् ।

सिडिएस एण्ड क्लियरिङ्ग लिमिटेडले विकास गरेको मेरो सेयर मोबाइल एप, मेरो सेयर वेवसाइटबाट लगानीकर्ताले अनलाइनबाट आवेदन दिन सक्नेछन् ।

यस्तै नेपाल धितोपत्र बोर्डबाट स्वीकृती प्राप्त आस्बा सेवामा सहभागी बैंक तथा वित्तीय संस्थाहरु तथा तिनका तोकिएका शाखा कार्यालयहरुबाट समेत सि आश्वा प्रणालीबाट ऋणपत्र किन्न सकिन्छ ।

बैंकको धितोपत्र निष्काशन तथा बिक्री प्रबन्धक एनआईबिएल एस क्यापिटल लिमिटेड रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।