उच्च जोखिम रेटिङ्ग पाएको सानिमा मिडिल तमोरले आजदेखि खोल्यो आईपीओ बिक्री

केयर रेटिङ्ग नेपालले दायित्व बहन गर्ने क्षमतामा उच्च जोखिम रहेको संकेत जनाउने क्रेडिट रेटिङ्ग दिएको सानिमा मिडिल तमोर हाइड्रोपावर लिमिटेडले बुधबारदेखि आईपीओ बिक्री खुला गरेको छ ।

कम्पनीलाई क्रेडिट रेटिङ्ग एजेन्सी ‘केयर एनपी डबल बी इस्यूअर रेटिङ्ग’ प्रदान गरेको छ । यसले कम्पनीको दायित्व बहन गर्ने क्षमतामा उच्च जोखिम रहेको संकेत गर्दछ । साधारणतया कम्पनीलेहरुले अंकित मूल्यमा नै सेयर बिक्री गर्ने भएकाले त्यति धेरै जोखिम नहुने गरेपनि कम्पनीको वित्तीय अवस्था भने निकै कमजोर देखिएको छ ।

यस कम्पनीको लगानीकर्ताले कम्पनीमा गरिएको साधारण लगानी फिर्ता पाउन करिब ७ वर्ष र डिस्काउन्टमा लगानी फिर्ता पाउन साढे १३ वर्ष लाग्ने देखिएको छ । कम्पनी गत आव २०७८।७९ सम्म ४ करोड रुपैयाँ नोक्सानीमा रहेको छ भने प्रतिसेयर आम्दानी २.२६ रुपैयाँ ऋणात्मक रहेको छ । कम्पनीको प्रतिसेयर नेटवर्थ पनि अंकित मूल्यभन्दा तल ९८.४३ रुपैयाँ रहेको छ । ७३ मेगावाट क्षमताको उक्त आयोजनाको निर्माण लागत १३ अर्ब ३३ करोड रहेकाले प्रतिमेगावाट १८ करोड २६ लाख रुपैयाँ रहेको छ ।

कम्पनीले आयोजना प्रभावित क्षेत्र र वैदेशिक रोजगारीमा रहेका श्रमिकहरुलाई पहिलो चरणमा सेयर बिक्री खुला गरेको हो । कम्पनीले जारी गरेको सेयरमध्ये ३३ लाख ३२ हजार ५०० कित्ता साधारण सेयर खरिदका लागि आयोजना प्रभावित क्षेत्र ताप्लेजुङ्गका बासिन्दाले आवेदन दिन सक्नेछन् ।

जसमा आयोजना अति प्रभावित क्षेत्र फुङलिङ नगरपालिका वडा नम्बर १, २, ९ र १०, फक्ताङलुङ गाउँपालिका वडा नम्बर १ तथा भिक्वाखोला गाउँपालिका वडा नम्बर १ र २, मेरिङदेन गाउँपालिका वडा नम्बर २ र ३, आठराई त्रिवेणी गाउँपालिका वडा नम्बर ५ तथा मैवाखोला गाउँपालिका वडा नम्बर १ मा बसोबास गर्ने स्थानीय बासिन्दाहरुका लागि ४० प्रतिशत बराबरले हुन आउने १३ लाख ३३ हजार कित्ता र आयोजना प्रभावित क्षेत्र ताप्लेजुङ्ग जिल्लाका बासिन्दाहरुका लागि ६० प्रतिशत अर्थात् १९ लाख ९९ हजार ५०० कित्ता सेयर निष्कासन गरिएको छ ।

साथै सर्वसाधारणमा निष्कासन हुने सेयरको १० प्रतिशतले हुन आउने ४ लाख ९९ हजार ८७५ कित्ता साधारण शेयर नेपाल सरकारको सम्बन्धित निकायबाट श्रम स्वीकृती प्राप्त गरी विदेशमा रोजगार गरी रहेका नेपालीहरुका लागि निष्कासन गरेको छ । कम्पनीले सर्वसाधारणका लागि ४९ करोड ९८ लाख ७५ हजार रुपैयाँ बराबरको ४९ लाख ९८ हजार ७५० कित्ता साधारण सेयर छुट्टाएको छ ।

आईपीओमा माघ १८ गतेसम्म आवेदन दिन सकिन्छ । आयोजना प्रभावित क्षेत्रका स्थानीय बासिन्दाहरुका लागि निष्काशित सेयर सबै बिक्री नभएको खण्डमा ढिलोमा फागुन ४ गतेसम्म खुल्नेछ ।

कहाँबाट दिने आवेदन ?

कम्पनीको सेयर खरिका लागि स्थानीय बासिन्दाले सानिमा मिडिल तमोर हाइड्रोपावरको कार्यालय, सानिमा बैंक, लक्ष्मी बैंक, ग्लोबल आइएमई बैंक र सनराइज बैंकका तोकिएका विभिन्न शाखा कार्यालयबाट आवेदन दिन सक्ने व्यवस्था गरिएो छ।

यस्तै वैदेशिक रोजगारीमा रहेका नेपालीहरुले भने सम्पूर्ण सि–आस्वा सदस्य बैंक तथा वित्तीय संस्था र तोकिएका शाखा कार्यालयहरुबाट आवेदन दिन सक्नेछन्। आवेदन दिँदा प्रति दरखास्त फारामबापत आवेदकले २ रुपैयाँ शुल्क बुझाउनुपर्नेछ । त्यसका लागि रेमिट्यान्स खाता खोली पछिल्लो ६ महिनाभित्र उक्त खातामा कार्यरत मुलुकबाट नेपालमा न्यूनतम ५० हजार रुपैयाँ पैसा पठाएको हुनुपर्नेछ ।

कम्पनीको धितोपत्र निष्कासन तथा बिक्री प्रबन्धक सानिमा क्यापिटल लिमिटेड रहेको छ ।  सबै चरणको आईपीओ निष्कासनपछि कम्पनीको चुक्ता पुँजी ३ अर्ब ३३ करोड २५ लाख रुपैयाँ पुग्नेछ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।