सेयर लगानीकर्ता हौसिँदा एकैदिन ७६.६४ अंकको बढोत्तरी, २१७७ बिन्दुमा पुग्यो नेप्से

नेपाल राष्ट्र बैंकले सोमबार देशको बाह्य क्षेत्रमा समेत आशातित सुधार आएको वित्तीय अवस्था सार्वजनिक गरेपछि सेयर बजारका लगानीकर्ता हौसिएका छन् । यसले सेयर बजारमा उछाल नै आएको छ ।

नेपाल स्टक एक्सेचञ्ज (नेप्से) का अनुसार मंगलबार बजार सूचक नेप्सेमा ३.६५ प्रतिशत अर्थात ७६.६४ अंकको उच्च बढोत्तरी देखिएको हो । यसदिन ठूला कम्पनीको सेयर कारोबार सूचक सेन्सेटिभ इन्डेक्स पनि ३.२० प्रतिशतले बढेर ४१५.०१ बिन्दुमा पुगेको छ ।

देशको अर्थतन्त्रमा देखिएको सुधारले सेयर बजारमा उछाल छाएको हो । राष्ट्र बैंकको तथ्याङ्क अनुसार मुद्रास्फिती घट्दै देशको समग्र अवस्था सुधारोन्मुख देखिएको हो । यस अवधिमा विप्रषण आप्रवाह पुसमा मात्रै १ खर्ब ४ अर्ब बढेर ५ खर्ब ८५ अर्ब पुगेको छ । यस्तै शोधान्तर स्थीति ९७ अर्ब १० करोडले बचतमा पुगेको छ भने चालु खाता घाटामा पनि सुधार हुँदै २९ अर्ब ४७ करोड रुपैयाँमा सुधारिएको छ ।

सरकारले आयात प्रतिबन्ध हटाएपनि २०७९ पुस मसान्तमा कुल वैदेशिक सञ्चिति १३ खर्ब ३७ अर्ब २९ करोड रुपैयाँ पुगेको छ । पुस मसान्तसम्ममा बैंक तथा वित्तीय संस्थासँग कुल विदेशी विनिमय सञ्चिति १ खर्ब ५३ अर्ब ९१ करोड कायम भएको छ । आर्थिक वर्ष २०७९÷८० को ६ महिनाको आयातलाई आधार मान्दा बैकिङ्ग क्षेत्रसँग रहेको विदेशी विनिमय सञ्चितिले १०.४० महिनाको वस्तु आयात र ९.१० महिनाको वस्तु तथा सेवा आयात धान्न पर्याप्त रहने देखिन्छ । वाार्षिक बिन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ७.२६ प्रतिशत रहेको छ ।

नेप्सेका अनुसार मंगलबार अघिल्लो दिनको तुलनामा १ अर्ब ८९ करोडले कारोबार बढेर ३ अर्ब ३६ करोड २२ लाख ६७ हजार ७८ रुपैयाँ बराबरको कारोबार भएको छ । कारोबार रकम मात्र होइन कारोबार संख्या र कित्तामा समेत अघिल्लो दिनको तुलनामा उच्च बढोत्तरी भएको छ । मंगलबार २६० कम्पनीका ९३ लाख ३३ हजार ७८८ कित्ता सेयर ५९ हजार ९२७ वटा संख्यामा खरिद बिक्री भएका छन् । सोमबार २५९ कम्पनीका ३९ लाख २२ हजार २१६ कित्ता सेयर २९ हजार ८६७ वटा संख्यामा खरिद बिक्री हुँदा कारोबार रकम १ अर्ब ४७ करोडमा समेटिएको थियो ।

नौं कम्पनीको सेयरमूल्यमा ९ प्रतिशत धेरै वृद्धि

मंगलबार बजारमा ९ वटा कम्पनीको सेयरमूल्य ९ प्रतिशतभन्दा धेरै बढेको छ । बरुण हाइड्रोपावर, खानीखोला हाइड्रोपावर, राद्यी विद्युत कम्पनी र आदर्श लघुवित्तको सेयरमूल्य १० प्रतिशतले बढेर सकारात्मक सर्किट लागेको छ ।  यस्तै आजको बजारबाट रिडी पावर, ग्रीन भेञ्चर, ङादी ग्रुप पावर, किसान लघुवित्त, हिमालयन हाइड्रोपावरको सेयरधनीले पनि ९ प्रतिशतभन्दा धेरैले वृद्धि भएको छ ।

उता मंगलबारको बजारबाट आईसीएफसी डिबेञ्चर २०८३ को इकाईमूल्य सर्वाधिक ५.९० प्रतिशतले घटेर १०१२.२० रुपैयाँमा झरेको छ । यस्तै एभरेष्ट बैंक डिबेञ्चर २०८६ को १.९५, एनआईबिएल प्रगति फन्ड १.६९, एसबिआई डिबेञ्चर १.५८ र लक्ष्मी बैंक डिबेञ्चर २०८८ को इकाईमूल्य १ं२९ प्रतिशतले घटेको छ ।

एनआईसी एशिया बैंकको सर्वाधिक कारोबार

आजको बजारमा एनआईसी एशिया बैंकको सर्वाधिक कारोबार भएको छ । बैंकको सेयर ८३५ रुपैयाँका दरले १ लाख ५४ हजार ७३७ कित्ता सेयर १२ करोड ९२ लाख ४२ हजार ७२६ रुपैयाँमा खरिद बिक्री भएको छ ।

यस्तै ङादी ग्रुप पावरको ११ करोड ३ लाख, अपि पावरको ३ करोड ४० लाख, नेपाल लाइफको ८ करोड ३ लाख, र हिमालयन डिष्टिलरीको ६ करोड ६४ लाख रुपैयाँ बराबरको सेयर कारोबार भएको छ ।

नेप्सेमा आएको उच्च बढोत्तरीले मंगलबार एकैदिन लगानीकर्ताको सम्पत्ति १ खर्ब १० अर्ब ६० करोड रुपैयाँले बढेको छ । सोमबारको कारोबारपछि कुल बजार पुँजीकरण ३० खर्ब ३१ अर्ब ४२ करोड ६८ लाख रुपैयाँ रहेकोमा मंगलबारको कारोबापछि ३१ खर्ब ४२ अर्ब २ करोड ३२ लाख रुपैयाँमा समेटिएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।