शेयर बजारमा सुधार आउन थालेपछि कारोबार रकममा पनि दैनिक बढोत्तरी

यो साताको पछिल्लो तीन शेयर बजार परिसूचक नेप्से तथा कारोबार रकममा समेत लगातार वृद्धि देखिएको छ। बजारले सुधारको गति लिन थालेपछि दैनिक कारोबार रकम समेत बढ्दै गएको हो ।

शेयर बजार निरन्तर ओरालो लाग्दा निराश बनेका लगानीकर्ताले बजार विस्तारै बढ्न थालेपछि लगानी समेत बढाउँदै लगेका छन् । जसले गर्दा दैनिक कारोबार रकममा समेत क्रमश सुधार देखिएको छ ।

पछिल्लो तीन दिनमा मात्र नेप्से झण्डै २० अंकले उकालो लागेको छ । मंगलबार ३.७५ अंकले बढेको बजार, बुधबार ८.७२ अंकले बढेको थियो भने सातको अन्तिम दिन विहीबार ७.४५ अंकले उकालो लागेर ११३१.९२ अंकमा पुगेको छ ।

पछिल्ला तीन दिनको कारोबार रकममा पनि क्रमश स्ुधार देखिएको छ । मंगलबार २३ करोड बढीको कारोबार भएको बजारमा बुधबार साढे २६ करोड बढीको कारोबार भएको थियो । विहीबार कारोबार रकम बढेर ३५ करोड ८८ लाख पुगेको छ । अघिल्लो दिनको तुलनामा कारोबार रकम ९ करोड बढी हो ।

विहीबारको बजारमा १६८ कम्पनीको १० लाख ९५ हजार कित्ता शेयर किनबेच भयो । कारोबारमा आएका उत्पादन समूह बाहेक बाँकी सबै समूहका सूचक उकालो लागेको छ ।

यसदिन सबैभन्दा धेरै कारोबार नेपाल लाइफको ३ करोड ५१ लाख बराबरको शेयर किनबेच भयो । एनएमबि बैंकको पनि २ करोड २२ लाख बराबरको कारोबार भयो।

समटि लघुवित्तको सबैभन्दा धेरै ७ प्रतिशत भन्दा धेरैले शेयर मूल्य बढेको बजारमा गणपति माइक्रो, सामुदायिक लघुवित्त, नविल इक्वीटी फण्ड तथा गुराँस लाइफ लगायतको शेयर मूल्य बढेको छ । सबैभन्दा धेरै दिव्यश्वरी हाइड्रोको शेयर मूल्य ७ प्रतिशत बढीले ओरालो लाग्यो । वरुण हाइड्रो महुली लघुवित्त लगायतको शेयर मूल्य घटेको छ ।