नाफा सुरक्षित गर्न अल्पकालीन कारोबारी हाबी हुँदा नेप्सेमा दोहोरो अंकको गिरावट

लगातार आठ कारोबार दिन बजार बजार बढ्दा ६१ अंक माथि उक्लिएको नेप्सेमा अल्पकालीन कारोबारीहरु नाफा सुरक्षित गर्न सक्रिय हुदाँ दोस्रो दिन पनि बजारमा गिरावट आएको छ ।

अघिल्लो दिन करिब ५ अंकले घटेको नेप्से सूचक सोमबार झण्डै १४ अंकले ओरालो लागेको छ । नाफा सुरक्षित गर्ने क्रममा शेयर बिक्रीमा चाप पर्दा नेप्से सूचक घट्न पुग्यो भने बजारले ओरालो लय समात्दा कारोबार रकमममा समेत गिरावट आएको छ । 

सोमबार नेप्से सूचक १३.७५ अंकले घटेर ११५४.११ विन्दुमा झरेकोे छ । यसदिन १६६ कम्पनीको १३ लाख ७१ हजार कित्ता शेयर ४० करोड ७८ लाख बराबरमा किनबेच भए । कारोबार रकम अघिल्लो दिनको तुलनामा २८ करोड कम हो।

सोमबारको बजारमा कारोबारमा आएका सबै समूहका सूचक घटेका छन् । यसदिन बीमा कम्पनी, जलविद्युत र अन्य समूहका सूचकमा उच्च गिरावट देखिएको छ । यसदिन पनि एनएमबि बैंकको सबैभन्दा धेरै ४ करोड बढीको शेयरको किनबेच भयो । स्वाबलम्वन लघुवित्त, एनआईसि एशिया तथा नेपाल बैंक लगायतको उच्च कारोबार भएको छ ।

यसदिन दिब्येश्वरी हाइडो र युनियन हाइडोको शेयर मूल्य पाँच प्रतिशत बढीले उकालो लागेको छ । सिटी एक्सप्रेस, सामुदायिक लघुवित्त तथा लक्ष्मी लघुवित्त लगायतको मूल्य बढेको छ ।

सबैभन्दा धेरै हिमालयन पावर पाटर्नरको शेयर मूल्य ९ प्रतिशत बढीले घटेको बजारमा महुलि लघुवित्त, राष्टिय बीमा कम्पनी, नेपाल हाइडो लगायतको शेयर मूल्य धेरै घटेको छ ।