मुक्तिनाथ विकास बैंकका पूर्व सिईओ ढकाल अध्यक्ष चयन, लाभांश पारित

मुक्तिनाथ विकास बैंकको मंसिर ३० गते पोखरामा सम्पन्न तेह्रौं वार्षिक साधारण सभाले गत आर्थिक बर्षको लाभांश पारित गर्नुका साथै नयाँ संचालक समिति चयन गरेको छ ।

साधारण सभाले आ.व. ०७५/०७६ को मुनाफाबाट शेयरधनीलाई १७.६० बोनश शेयर र कर प्रयोजनार्थ ०.९३ प्रतिशत नगद लाभांश सहित १८.५३ प्रतिशत लाभांश वितरण गर्ने प्रस्ताव पारित गरेको छ ।

बैंकले केही समय अघि निष्काशित २० प्रतिशत हकप्रदले समेत पाउने गरि १७.६० प्रतिशत बोनस शेयर र कर प्रयोजनका लागि ०.९३ प्रतिशत नगद लाभांश वितरण गर्ने प्रस्ताव पारित गरेको हो ।

साधारण सभा प्रयोजनका लागि बैंकले मंसिर २३ गते शेयरधनी दर्ता पुस्तिका बन्द गरेको थियो । जस अनुुसार मंसिर २२ गते आइतबारसम्म बैंकका शेयर धनीले लाभांश पाउनेछन् ।

बैंकको साधारण सभाले अन्य बैंक तथा वित्तीय संस्थासँग मर्जर तथा विलय प्रकृयालाई पनि अघि बढाउन उपयुक्त संस्थाको खोजी तथा प्रकृया अघि बढाउन सञ्चालक समितिलाई अख्तियारी दिएको छ ।

३ अर्ब ६७ करोड ७७ लाख रुपैंया चुक्ता पूँजी रहेको बैंकको प्रस्तावित बोनस वितरण पश्चात चुक्ता पूँजी ४ अर्ब ३२ करोड रुपैयाँ नाघ्नेछ

साथै बैंकको वार्षिक साधारण सभाले बैंकका संस्थापक कार्यकारी प्रमुख भरतराज ढकालको अध्यक्षतामा नयाँ सञ्चालक समिति गठन गरेको छ । सञ्चालक समितिमा गजेन्द्र मान श्रेष्ठ, रविन्द्र मान श्रेष्ठ, श्रीमती निर्मला कुमारी के.सी. (कार्की) र शालिग्राम मिश्र  चयन भएको बैंकका प्रमुख सूचना अधिकृत तिल बहादुर गुरुङ्गले बताए ।