कामना सेवा विकास बैंकको लाभांश पारित, १७ करोड २७ लाख नगद बाड्ने

कामना सेवा विकास बैंकको १३ औं वार्षिक साधारण सभाले हाल कायम चुक्ता पूँजीको ६.८ प्रतिशत नगद लाभांश वितरण गर्ने प्रस्ताव पारित गरेको छ ।

हाल बैंकको चुक्तापूँजी २ अर्ब ५४ करोड एक लाख ९५ हजार रुपैयाँ छ । बैंकले १७ करोड २७ लाख रुपैयाँ बराबरको नगद लाभांश वितरण गर्नेछ ।

यसका साथै, अन्य कुनै उपयुक्त बैंक तथा वित्तीय संस्थासँग मर्ज वा एक्वीजीशनका लागि आवश्यक सम्पूर्ण कार्यहरु गर्न गराउन सञ्चालक समितिलाई अख्तियारी दिने प्रस्ताव पनि पारित गरेको छ ।

साधारण सभा तथा लाभांश वितरण प्रयोजनको लागि बैंकले मंसिर ३० गतेदेखि पुस १७ गतेसम्म शेयर दाखिल खारेज बन्द गरेको थियो । यसअनुसार मंसिर २९ गते, आइतबारसम्म नेप्सेमा कारोबार भई कायम शेयरधनीहरुले लाभांश प्राप्त गर्नेछन् ।

साधारण सभाामा बैंकका प्रमुख कार्यकारी अधिकृत प्रवीण बस्नेतले चालु आर्थिक वर्षको स्वीकृत बजेट तथा कार्यक्रम अनुसार निर्धारण गरिएका लक्ष्यहरु हासिल हुने गरी कार्यक्रम संचालन गरेको बताए ।

काठमाडौं –३०, ज्ञानेश्वरमा केन्द्रीय कार्यालय रहेको बैंकले देशका विभिन्न भागहरुमा ११४ वटा शाखा तथा ६० वटा एटीएम मार्फत ग्राहकहरुलाई सेवाहरु प्रदान गर्दै आएको छ ।