जर्मनीद्वारा हरित उद्योगका लागि प्रमुख अनुदान योजना सुरु

जर्मनीले मङ्गलबार ‘नवप्रवर्तनशील’ मल्टी–बिलियन–युरो अनुदान योजना सुरु गरेको छ । यसको उद्देश्य युरोपको शीर्ष अर्थतन्त्रमा औद्योगिक उत्पादनलाई थप जलवायु अनुकूल बनाउने टर्बोचार्जिङ लगानी गर्नु हो ।

ऊर्जामन्त्री रोबर्ट ह्याबेकले कार्यक्रमको पहिलो चरणमा चार अर्ब युरो (चार अर्ब ४० करोड अमेरिकी डलर) को लगानी गरिने जानकारी दिए। यसमा ग्लास, स्टिल र कागज बनाउनेजस्ता ऊर्जा–गहन क्षेत्रका कम्पनीहरूलाई उत्सर्जन कटौती गर्न हरित प्रविधि परियोजनाको प्रस्ताव प्रस्तुत गर्न आमन्त्रण गरिनेछ ।

“हामी यसलाई प्रस्तुत गर्ने पहिलो औद्योगिक मुलुक हौँ”, ह्याबेकले पत्रकार सम्मेलनमा भने। उनले उक्त योजनालाई ‘अभिनव र नयाँ उपकरण’ भने। उनका अनुसार यसले निष्क्रियतालाई कम गर्छ, प्राविधिक आविष्कारलाई प्रवर्द्धन गर्छ र जर्मनीलाई आफ्नो जलवायु लक्ष्यहरूमा पुग्न सहयोग गर्छ ।

उनले ‘जलवायु संरक्षण सम्झौता’ १५ वर्षसम्म चल्ने जानकारी दिँदै सबैभन्दा कम लागतमा आफ्नो उत्पादन प्रक्रियालाई डिकार्बोनाइज गर्नसक्ने कम्पनीहरूलाई सरकारले अनुदान दिने बताए। मन्त्री ह्याबेकले समग्र कार्यक्रमका लागि ‘मध्य–दुई अङ्क’ अर्ब युरोको राशि छुट्याइएको बताए। उन्नाइस अर्ब युरोको अनुदानका लागि बिडिङको अर्को चरण शरद ऋतुमा खुल्नेछ ।

जर्मनीको महत्त्वपूर्ण उत्पादन उद्योगले मन्दीको सामना गर्नुपरिरहेको, मुद्रास्फीति, कमजोर वैश्विक माग र युक्रेनमा रुसको युद्धले सस्तो ग्यासको आयातमा पहुँच बन्द गरेपछि ऊर्जाको बढ्दो लागतको सामना गर्नुपरेको अवस्थामा यो योजना आएको हो ।

“अर्थतन्त्र र निश्चितरूपमा जलवायु संरक्षणका लागि प्रोत्साहनका रूपमा हामीलाई यसको आवश्यकता छ”, मन्त्री ह्याबेकले भने ।

अर्थ मन्त्रालयका अनुसार यो योजनाबाट सन् २०४५ सम्म उद्योगबाट कार्बन उत्सर्जनलाई ३५ करोड टनसम्म घटाउने अपेक्षा गरिएको छ । जर्मनीको लक्ष्य सन् २०४५ सम्म कार्बन तटस्थ बन्नु हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।