रणनीतिक साझेदार भित्र्याएपछि युनाइटेड फाइनान्समा देखियो निरन्तर सुधार

युनाइटेड फाइनान्स (UFL) ले चालु आर्थिक वर्षको दोस्रो त्रैमासिकमा गत आवको यसै अवधिको तुलनामा २३.४२ प्रतिशतले खुद नाफा बढाएको वित्तीय विवरण सार्वजनिक गरेको छ ।

 मुत्तूट फाइनान्सलाई रणनीतिक साझेदारको रुपमा भित्र्याएपछि फाइनान्सको प्रगतिमा निरन्तर सुधार आउन थालेको छ । फाइनान्सले भारतको कोचीस्थित मुत्तूट फाइनान्सलाई १९० रुपैयाँका दरले २१ लाख कित्ता नयाँ संस्थापक संस्थापक एफपिओ बिक्री गरेर वैदेशिक रणनीतिक साझेदारीको रुपमा भित्र्याएको थियो ।

फाइनान्सले चालु आर्थिक वर्षको दोस्रो त्रैमासिक अर्थात पुस मसान्तसम्म ४ करोड ११ लाख रुपैयाँ खुद नाफा गरेको छ । अघिल्लो पुससम्म फाइनान्सको नाफा ३ करोड ३३ लाख रुपैयाँ मात्रै थियो । फाइनान्सले गत पुस मसान्तको तुलनामा ७८ लाख रुपैयाँले नाफा बढाएको हो ।

६ महिनाको अवधिमा कम्पनीको वितरण योग्य मुनाफा भने २ करोड १९ लाख रुपैयाँ छ । जसको प्रतिशेयर आम्दानी ७ रुपैयाँ ९१ पैसा तथा नेटवर्थ १४३ रुपैयाँ कायम भएको छ ।

युनाइटेडले पुस मसान्तसम्म ६ अर्ब ८१ करोड निक्षेप संकलन गरेर ५ अर्ब ७४ करोड रुपैयाँ कर्जा लगानी गरेको छ । जसबाट फाइनान्सले ८ करोड ७३ लाख खुद ब्याज आम्दानी गरेको छ ।

एक अर्ब ४ करोड चुक्ता पुँजी रहेको कम्पनीको जगेडा कोषमा २४ करोड, शेयरधनीकोषमा १५ करोड तथा रिटेन अर्निङमा ४ करोड जम्मा गरेको छ ।

कम्पनीको खराब कर्जाको आकार भने ०.९९ प्रतिशतबाट बढेर १.२९ प्रतिशत पुगेको छ । जसको स्प्रेड दर ४.९७ प्रतिशत छ भने आधार ब्याजदर १२.३४ प्रतिशत छ । कस्ट अफ फण्ड ९.३१ प्रतिशत छ ।