साढे १३ प्रतिशत घट्यो वाणिज्य बैंकहरुको नाफा

वाणिज्य बैंकहरुले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण प्रकाशित गरेका छन् । विवरण अनुसार बैंकहरुको खुद नाफा गत आर्थिक वर्षको सोही अवधिको तुनलामा १३.४७ प्रतिशत घटेको छ ।

गत आर्थिक वर्षको चैत मसान्तसम्ममा ४७ अर्ब १ करोड ५३ लाख रुपैयाँ खुद नाफा कमाएका वाणिज्य बैंकहरुले यस आर्थिक वर्षको सोही अवधिसम्ममा ४० अर्ब ६८ करोड ३१ लाख रुपैयाँ मात्र कमाउन सफल भएका छन् । यस अवधिमा हाल सञ्चालनमा रहेका २० वाणिज्य बैंकहरुमध्ये १३ बैंकहरुको नाफा घटेको छ भने ७ बैंकहरु भने नाफा बढाउन सफल भएका छन् ।

समीक्षा अवधिमा सबैभन्दा बढी नाफा बढाउन सफल बैंक कृषि विकास बैंक रहेको छ । सो बैंकको खुद नाफा समीक्षा अवधिमा ९७.२२ प्रतिशत बढेको छ । गत आर्थिक वर्षको तेस्राे त्रैमासिक अवधिमा १ अर्ब ४ करोड रुपैयाँ नाफा कमाएको यस बैंकले चालु आर्थिक वर्षको सोही अवधिमा २ अर्ब ५ करोड रुपैयाँ खुद नाफा कमाउन सफल भएको छ।

त्यसैगरी, समीक्षा अवधिमा नाफा बढाउन सफल बैंकहरुमा लक्ष्मी सनराइज, प्राइम कमर्सियल, सिद्धार्थ, हिमालयन, नेपाल इन्भेष्टमेन्ट मेगा, र एभरेष्ट बैंक रहेका छन् ।

चालु आर्थिक वर्षको तेस्रो त्रैमाससम्म नेपाल बैंकले सबैभन्दा कम १३ करोड ५ लाख मात्र खुद नाफा आर्जन गरेको छ । गत आवको चैत मसान्तसम्म १ अर्ब ७८ करोड खुद नाफा कमाएको यस बैंकको खराब कर्जा नोक्सानी वापत नै झण्डै पौने ४ अर्ब सम्भावित कर्जा नोक्सानी व्यवस्थापन गरेपछि खुद नाफामा ९२ प्रतिशतभन्दा धेरैले घटेको हो ।