फण्डको लागत घटाएर स्प्रेड बढाउँदा समेत स्ट्याण्डर्ड चार्टर्डको नाफा ३ प्रतिशतले मात्र बढ्यो

आर्थिक वर्ष ०७६/०७७ को तेस्रो त्रैमासमा स्ट्याण्डर्ड चार्टर्ड बैंकले वित्तीय स्रोतको लागत घटाएर स्प्रेड नेपाल राष्ट्र बैंकले तोकेको सिमा भन्दा माथि गएर पनि नाफामा सामान्य वृद्धि गरेको छ । बैंकले कस्ट अफ फण्ड घटाएर स्प्रेड ५ प्रतिशत भन्दा माथि पुर्याउदा पनि ३ प्रतिशतले मात्र नाफा बढाएको हो ।

चालु आर्थिक वर्षको तेस्रो त्रैमासमा बैंकको कष्ट अफ फण्ड घटेर ४.९७ प्रतिशतमा झरेको छ भने कर्जा निक्षेपको ब्याज अन्तर (स्प्रेड) बढेर ५.३२ प्रतिशत पुगेको छ । यो अवस्थामा बैंकले चैतसम्ममा ३.९२ प्रतिशतको ग्रोथ गरेको हो ।

गत आर्थिक वर्षको चैतसम्ममा बैंकको कस्ट अफ फण्ड ५.४१ प्रतिशत थियो भने स्प्रेड रेट ४.७५ प्रतिशत रहेको थियो । नेपाल राष्ट्र बैंकका अनुसार चालु आर्थिक वर्षको असार मसान्तसम्ममा ४.४ प्रतिशतमा झार्नु पर्ने स्प्रेड रेट झनै बढाएर बैंकले ५.३२ प्रतिशतमा पुर्याएको छ । बैंकहरुले २०७६ असारमा नै स्प्रेड रेट ४.५ मा झार्नु पर्ने व्यवस्था थियो ।

निक्षेप दिने र कर्जामा लिने ब्याजको अन्तर नियामकले तोकेको भन्दा धेरै असुली गरेको अवस्थामा पनि बैंकले चैत मसान्तसम्ममा ६ करोड ८१ लाख रुपैयाँले नाफा वृद्धि गरेको छ ।

चालु आर्थिक वर्षको चैतसम्ममा बैंकहरुले असुल गर्नु पर्ने कर्जा तथा ब्याज कारोना भाइरसको माहामारीका कारण सरकारले लगाएको लकडाउनले असुल हुन सकेन । त्यसका साथै ब्याजमा केही छुट समेत दिनु परेको र कर्जा तिर्ने समय समेत थप गरीएको हुनाले उठ्न पर्ने कर्जा समेत बाँकी रहदा पनि नाफामा केही असर गरेको हो ।

बैंकले चालु आर्थिक वर्षको चैत मसान्तसम्ममा एक अर्ब ८० करोड रुपैयाँ खुद नाफा गरेको छ । यो नाफा गत आर्थिक वर्षको सोही अवधिको तुलनामा ३.९२ प्रतिशतले धेरै हो । बैंकले गत आर्थिक वर्षको यसै अवधिमा एक अर्ब ७३ करोड रुपैयाँ खुद नाफा गरेको थियो ।

बैंकले चालु आर्थिक वर्षको सो अवधिमा खुद ब्याज आम्दानी ९.३४ प्रतिशतले बढाएको छ भने फि तथा कमिसन आम्दानी ८.३६ प्रतिशतले बढेको छ । बैंकको ब्याज आम्दानी र फि तथा कमिसन आम्दानीमा देखिएको समान्य सुधारको प्रभाव खुद नाफा देखिएको हो । यस अवधिमा बैंकको कर्मचारी खर्च पनि साढे १३ प्रतिशत भन्दा धेरैले बढेको छ ।

चालु आर्थिक वर्षको चैतसम्ममा बैंकले २ अर्ब ७९ करोड रुपैयाँ खुद ब्याज आम्दानी गरेको छ । त्यसैगरी बैंकले सो अवधिमा ५७ करोड ४५ लाख रुपैयाँ फि तथा कमिसन आम्दानी गरेको छ । चालु आर्थिक वर्षको चैतसम्ममा बैंकको निक्षेप ८५ अर्ब ५१ करोड रुपैयाँ रहेको छ भने कर्जा ५७ अर्ब ५७ करोड रुपैयाँ रहेको छ ।

बैंकको प्रतिशेयर आम्दानी ३० रुपैयाँमा सिमित छ । बैंकको मूल्य आम्दानी अनुपात भने १९.६७ गूणाले बढी छ ।

चालु आर्थिक वर्षको चैतसम्ममा बैंकको खराब कजार्मा समेत समान्य वृद्धि देखिएको छ । गत आर्थिक वर्षको चैतसम्ममा बैंकको खराब बर्जा ०.२० प्रतिशत रहेकोमा चालु आर्थिक वर्षको सोही अवधिमा ०.२२ प्रतिशत पुगेको छ ।

चैतसम्ममा बैंकको आधार ब्याजदर पनि ७.२७ प्रतिशतमा झरेको छ । गत आर्थिक चैतसम्ममा बैंकको आधार ब्याजदर ७.७४ प्रतिशत रहेको थियो ।