नेप्से २९ अंकले घट्दा कारोबारमा पनि उच्च गिरावट

दैनिक एकपछि अर्को रेकर्ड तोड्दै नयाँ-नयाँ रेकर्ड कायम गर्दै आएको नेप्से चौथौं कारोबार दिनमा आएर घटेको छ । यसबीचमा माघ २१ गते बुधबार ६ अंकले घटेपछि ९४ अंकले बढेको बजारमा मंगलबार २९.०१ अंकको गिरावट हुँदै नेप्से २५३२.४६ बिन्दुमा बन्द भएको हो ।

मंगलबार कारोबारको सुरवातदेखि नै उच्च बिक्रीचाप झेलेको नेप्सेले २ः३५ मा २५२४.४४ बिन्दुसम्म झरेको थियो । अल्पकालीन लगानीकर्ताहरुको उच्च बिक्रीचापले बजार सूचकमा मंगलबार उच्च  अंकको गिरावट आएको हो । तर दीर्घकालीन लगानीकर्ताले घट्दो बजारमा शेयर बिक्री गर्न नचाहेका कारण कारोबार घटेको हो । दीर्घकालीन लगानीकर्ताले शेयर होल्ड गरेका कारण बुधबार शेयर बजारमा बाउन्स ब्याक हुने एक लगानीकर्ताले बताए ।

मंगलबार टिएमएस र नेप्सेको म्याचिङ्ग इन्जिनबीच सम्पर्क स्थापित हुँदा आधा घण्टा बढी शेयर कारोबार ठप्प भएपछि नेप्सेले ३ बजेपछि ३५ मिनेट शेयर कारोबार समय थप गरेको थियो ।

आज १९४ कम्पनीका १ करोड ५९ लाख ८५ हजार १९८ कित्ता शेयर ७१ हजार ११२ पटक  खरीद बिक्री हुादा कारोबार रकम ८ अर्ब १४ करोड ६२ लाख ६९ हजार १९३ रुपैयाँ पुगेको छ । यो रकम सोमबारको तुलनामा २ अर्ब ४७ करोड रुपैयाँ कम हो ।

नेप्से सूचक हालसम्मकै उच्च २५६१.४१ विन्दुमा उक्लिदा सोमबार १० अर्ब ६१ करोड बढीको शेयर किनबेच भएको थियो । नेप्सेमा सोमबार ९२ हजार ७९ कारोबारबाट २ करोड ११ हजार ५५५ कित्ता शेयर किनबेच भएका थिए ।

मंगलबार वित्त र विकास बैंक बाहेक कारोबारमा आएका सबै दश उपसमुहका सूचक ऋणात्मक भएका छन् । माइक्रोफाइनान्सको सूचक सबैभन्दा धेरै २.७८ प्रतिशतले घटेको बजारमा निर्जीबन बीमा, उत्पादन, अन्य, ब्यापार, होटल जलविद्युत, जीवन बीमा पनि एक प्रतिशतभन्दा बढी बिन्दुले घटेको हो ।

• ग्रामीण विकास लघुवित्तको उच्च कारोबार

मंगलबार ग्रामीण विकास लघुवित्तको सर्वाधिक कारोबार भएको छ । लघुवित्तको २८ करोड २३ लाख रुपैयाँ र प्रभु बैंकको २४ करोड ५२ लाख रुपैयाँ बराबरको कारोबार भएको हो ।

यसैगरी ग्लोबल आइएमई बैंक, डिप्रोक्स लघुवित्त, नेपाल लाइफ, हिमालयन डिष्टिलरी, नबिल बैंक, पुनर्बीमा कम्पनी, नेपाल टेलिकम र एनआईसी एशिया बैंक शीर्ष कारोबार हुने दश कम्पनीभित्र समेटिएका छन् । दशौं ठूलो कारोबार भएको एनआईसी एशिया बैंकको १५ करोड ४७ लाख बढीको शेयर खरीद बिक्री भएको छ ।

• चार कम्पनीको शेयरमूल्यमा सकारात्मक सर्किट

मंगलबारको ऋणात्मक बजारमा पनि ४ कम्पनीको शेयरमा लगानी गरेका लगानीकर्ताहरु मालामाल भएका छन् । आजको बजारबाट गुडविल फाइनान्स, श्री इन्भेन्टमेन्ट फाइनान्स, समृद्धि फाइनान्स, र लुम्बिनी विकास बैंकको संस्थापक शेयरको मूल्यमा सकारात्मक सर्किट लागेको हो ।

प्रभु बैंकको संस्थापक, कालिका पावर, नेपाल ल्यूब आयल, आँखुखोला हाइड्रोपावर, कामना सेवा विकास बैंक, र ग्रामीण विकास लघुवित्तको पनि शेयरमूल्य बढेको छ ।

• यस्ता छन् गुमाउने कम्पनी

मंगलबारको बजारमा सपोर्ट माइक्रोफाइनान्स र निर्धन उत्थान लघुवित्तको शेयरमूल्य उच्च रुपमा घटेको छ । सपोर्ट माइक्रोफाइनान्स र निर्धन उत्थान लघुवित्त र माउन्टेन इनर्जी नेपालको शेयरमूल्य ५ प्रतिशत धेरैले घटेको छ ।  चालु आवको ६ महिना अवधिमा खुद नाफामा गिरावट आएपछि निर्धन उत्थानको शेयरमूल्यमा त्यसको असर देखिएको हो ।

यसैगरी गुराँस लघुवित्त, छ्याङ्दी हाइड्रोपावर, नेरुडे लघुवित्त, ग्लोबल आइएमई लघुवित्त, साधना लघुवित्त, घलेम्दी हाइड्रोपावर र रिडी हाइड्रोपावरको शेयरमूल्य घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।