ऋणात्मक बजारमा तीन कम्पनीको शेयरमूल्यमा सकारात्मक सर्किट ब्रेक

संसद पुनरस्थापनापछि आइतबार संघीय संसद आह्वान गरिएको छ । राजनीति कता जाला भन्ने दुविधाका कारण त्यसको प्रभाव आइतबारको शेयर बजारमा परेको छ ।

दिनभर तीव्र उतार चढावका बीच नेप्से २१.५९ बिन्दु घटेर बन्द भएको छ । कारोबारको सुरुवाति पाँच मिनेटमा नै प्रि ओपनिङ्गमा १३ अंकको बढेको नेप्से ३७ अंक बढी घटेपनि केही सम्हालिन खोजेपनि निरन्तर बिक्रीचापका कारण राताम्य भएर बन्द भएको छ ।

आइतबार २११ कम्पनीका १ करोड १७ लाख ७८ हजार ८२० कित्ता शेयर ५३ हजार ९७० पटक खरीद बिक्री हुँदा कारोबार रकम ५ अर्ब पुगेको छ । बिहीबार ६ अर्ब ५ करोडको शेयर कारोबार भएको बजारमा आइतबार कारोबार रकम १ अर्ब ५ करोड घटेको हो । नेप्से घटेसम्गै लगानीकर्ताको सम्पत्ति मापक कुल बजार पूँजीकरण आइतबार २९ अर्ब ७४ करोडले घटेर ३४ खर्ब २४ अर्बमा संकुचित बनेको छ । बिहीबार ३४ खर्ब ५३ अर्ब ७४ करोड रुपैयाँ कुल बजार पूँजीकरण रहेको थियो ।

नेप्से ऋणात्मक भएपनि तीन कम्पनीको शेयरमूल्यमा सकारात्मक सर्किट लागेको छ । चन्द्रागिरी हिल्स, नेपाल हाइड्रो डेभलोपर र रैराङ हाइड्रोपावरको शेयरमूल्य करिब १० प्रतिशतले बढेको छ । एक्सेल डेभलपमेन्ट बैंक, नेपाल इन्स्योरेन्स, र अपर तामाकोशीको शेयरमूल्य ५ प्रतिशत धेरैले बढेको बजारमा युनिभर्सल पावर, रिलायन्स फाइनान्स र अपर तामाकोशीको शेयरमूल्य ४ प्रतिशतले बढेको छ ।

यसदिन नेशनल हाइड्रोपावरको शेयरमा लगानी गरेका लगानीकर्ताले सबैभन्दा धेरै गुमाएका छन् । कम्पनीको शेयरमूल्य साढे ५ प्रतिशत धेरैले घटेको हो । यस्तै साल्ट ट्रेडिङको मूल्य पनि ५ प्रतिशतले घटेको छ । बोटलर्स नेपाल तराई, किसान लघुवित्त, श्री इन्भेष्ट फाइनान्स, सपोर्ट माइक्रोफाइनान्स, गुराँस लाइफ, बैंक अफ काठमाण्डू र मेरो माइक्रोफाइनान्स लगायत कम्पनीको शेयरमूल्य पनि ३ प्रतिशतले घटेको छ ।

कारोबारमा आएका अघिकांश कम्पनीको शेयरमूल्य घटेपछि ठूला कम्पनीहरुको सूचक मापक सेन्सेटिभ इन्डेक्स १.७८ अंकले घटेर ४४९.६८ बिन्दुमा झरेको छ । कारोबारमा आएका १३ उप समुहका सूचकमध्ये होटल र टुरिजम्को इन्डेक्स बाहेक जलविद्युत पनि सामान्य सकारात्मक रहेको छ । बाँकी सबै घटेका छन् । ब्यापारमा सबैभन्दा धेरै ४.६८ प्रतिशत गिरावट भोगेको बजारमा जीवन बीमा, लगानी, उत्पादनमुलक र लघुवित्तको इन्डेक्स पनि १ प्रतिशत बढीले घटेको छ ।

आइतबारको बजारमा निफ्राको सबैभन्दा धेरै शेयर कारोबार भएको छ । बैंकको ७ लाख ७९ हजार कित्ता शेयर ४२ करोड ७८ लाख रुपैयाँमा खरीद बिक्री भएका छन् । नेपाल बैंक ३९ करोड ६९ लाख र अपर तामाकोशीको २४ करोड २४ लाख रुपैयाँको शेयर कारोबार भयो ।

ग्लोबल आइएमई बैंक, नेपाल इन्स्योरेन्स, शिखर, पुनर्बीमा कम्पनी, नेको इन्स्योरेन्स, नेपाल लाइफ र नेपाल टेलिकमको उच्च कारोबार भएको छ । दशौं ठूलो कारोबार भएको टेलिकमको १० करोड ४६ लाख रुपैयाँको शेयर किनबेच भयो ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।