नेप्सेमा हरायो रौनकता: सूचक र कारोबार रकम दुबैमा कमी, चन्द्रागिरीको मूल्य घट्न थाल्यो

शेयर बजार परिसूचक नेप्से उच्च अंक २६४० पुगेर क्रमश करेक्शन हुँदै जान थालेपछि शेयर बजारमा रौनकता पनि दिनप्रतिदिन विस्तारै घट्न थालेको छ । बजारमा लाभांश सिजन सकिएर अफसिजन लागेसँगै शेयर बजारको रौनकता घट्न थालेको हो ।

दैनिक १० अर्ब माथि शेयर कारोबार हुने गरेको बजारमा आधा बढीले कारोबार रकम खुम्चिएपछि शेयर बजारको रौनकतामा कमी देखिएको छ । एकातिर नेप्से करेक्शनको मुडमा देखिएको छ भने अर्कोतर्फ बजार अझै घट्छ कि भन्ने आशंका लगानीकर्ता कायम नै रहेर लगानीकर्ताहरु ‘पर्ख र हेर’ को अवस्थामा रहँदा कारोबार रकम पनि घट्दै जान थालेको हो ।

सूचीकृतमध्ये ९० प्रतिशत धेरैको लाभांश घोषणा भैसकेको अवस्थाले पनि बजारमा अफसिजन लागेको बताइन्छ । अर्कोतर्फै चालु आवको तेस्रो त्रैमासको मिति नजिकिँदै गर्दा लगानीकर्ताहरुलाई ऋणको साँवा तथा ब्याज तिर्नुपर्ने बाध्यात्मक अवस्था रहेको छ ।

शेयर बजारका लगानीकर्ताहरुका अनुसार नेप्से निरन्तर बढेर उच्च अंकमा पुगेकाले हालको करेक्शन सामान्य भएको बताउँदै तेस्रो त्रैमासको वित्तीय विवरणले बजारमा थप उर्जा प्रदान गर्ने बताउँछन् ।

फागु पूर्णिमाको विदाका कारण साताको पहिलो कारोबार दिन आइतबार कारोबार नभएकोमा सोमबार नेप्सेमा ५.४५ अंकको समान्य गिरावट सहित २५४३ दशमलव ५२ मा नेप्से बन्द भएको छ । ठूला कम्पनीको सूचक मापक सेन्सेटिभ पनि ०.३९ अंकले घटेर ४४०९.९२ बिन्दुमा झरेको छ ।

आज २०८ कम्पनीका ९१ लाख ३८ हजार ९३५ कित्ता शेयर ६४ हजार ५१५ पटकको कारोबारबाट ४ अर्ब ४१ करोड ३ लाख ४५ हजार ३० रुपैयाँ बराबरमा खरीद बिक्री भएका छन् । कारोबारमा आएका ८९ कम्पनीको शेयरमूल्य बढेका छ भने १०२ कम्पनीको घटेको छ । १८ कम्पनीको मूल्य स्थीर रह्यो ।

उतार चढावपूर्ण रहेको बजारमा जलविद्युतको सूचक १ प्रतिशतले बढ्दा लघुवित्त र फाइनान्सको इन्डेक्स पनि समान्य सकारात्मक रह्यो । दश समुहको सूचक ऋणात्मक रहेको बजारमा ब्यापारमा सबैभन्दा धेरै ४.६२ प्रतिशतको गिरावट देखिएको छ भने चन्द्रागिरी हिल्सको मूल्य घटेपछि होटल तथा टुरिजम्को इन्डेक्स पनि ४ प्रतिशतले घटेको छ । बाँकी ८ समुह सामान्य घटेको छ ।

बजार सूचक घटेसँगै लगानीकर्ताको सम्पत्ति मापक कुल बजार पूँजीकरण ३५ खर्ब १२ अर्ब ७० करोड ६३ लाख रुपैयाँमा संकुचित बनेको छ । गत बिहीबार ३५ खर्ब २० अर्बको बजार पूँजीकरण रहेको थियो ।

• निफ्राको सर्वाधिक कारोबार

सोमबारको बजारमा नेपाल इन्फ्रास्टक्चर डेभलपमेन्ट बैंकको उच्च कारोबार भएको छ । बैंकको ४४ करोड ३१ लखको शेयर कारोबार भएको हो ।

अपर तामाकोशी र चन्द्रागिरी हिल्सको पनि ३७ करोड माथि कारोबार भएको छ । नेपाल बंगलादेश बैंक, एचआईडिसिएल, हिमालयन डिष्ट्रिलरी, अजोड इन्स्योरेन्स, पुनर्बीमा कम्पनी, नेपाल लाइफ र नबिल बैंकको शीर्ष दश ठूलो कारोबार भएको छ ।

• चार कम्पनीको शेयरमूल्यमा सकारात्मक सर्किट

आजको बजारमा चार कम्पनीको शेयरमूल्यमा सकारात्मक सर्किट लागेको छ । उन्नति सहकार्य लघुवित्त, अजोड इन्स्योरेन्स, महिला लघुवित्त, समीट लघुवित्तको मूल्य आकाशिएको हो ।

यसैगरी रिडी हाइड्रोपावर, सारथी नेपाल लघुवित्त, वोमी माइक्रोफाइनान्स, युनाइटेड इदिमर्दी हाइड्रोपावर, हिमालयन उर्जा विकास कम्पनी, र लक्ष्मी लघुवित्तको शेयरको भाउ पनि बढेको छ ।

• चन्द्रागिरी हिल्सको मूल्य सर्वाधिक घट्यो

सोमबार चन्द्रागिरी हिल्सको मूल्य सर्वाधिक घटेको छ । कम्पनीको मूल्य १४९ रुपैयाँ अर्थात ७.१७ प्रतिशतले घटेर १९३० रुपैयाँमा झरेको हो । चन्द्रागिरी हिल्सको शेयरमूल्य ३४ औं कारोबारको दिनमा सोमबार घटेको हो । कम्पनीको शेयरमूल्यमा सुरुवाति २ दिनबाहेक बाँकी विगत ३० दिनयता सकारात्मक सर्किट लेबलमा वृद्धि हुँदै आएको थियो ।

यसैगरी माउन्टेन हाइड्रोपावर, साल्ट ट्रेडिङ्ग कर्पोरेशन, कालिका पावरको शेयरमूल्य पनि ४ प्रतिशत धेरैले घटेको छ । एनएबि ५०, छ््याङ्दी हाइड्रोपावर, युनाइटेड फाइनान्स, एनसीसी बैंक, शिवश्री हाइड्रोपावर र प्रिमियर इन्स्योरेन्सको शेयरमूल्य घटेको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।