वैशाखमा उपलब्ध गराएको सेवा वापतको दाबी आजसम्म गर्न स्वास्थ्य बीमा बोर्डको अनुरोध

स्वास्थ्य बीमा बोर्डले सेवा प्रदायक संस्थालाई वैशाख महिनामा बीमितलाई उपलब्ध गराएको सेवा वापत दाबी गर्न बाँकी रकम जेठ २० (आज) गतेसम्म दाबी गर्न अनुरोध गरेको छ ।

बोर्डले विश्वभरि फैलिएको दोस्रो लहरको महामारीको विषम परिस्थितिका कारण देखिन गएको समस्या तथा ओपन आइएमआईएसको नयाँ भर्सन अद्यावधिक गर्ने कार्यलाई मध्यनजर गर्दै सेवा प्रदायक संस्थालाई यस्तो आग्रह गरेको हो ।

उक्त मिति पश्चात नियमित रुपमा उपलब्ध गराएको सेवाको दाबीका सम्बन्धमा अधिकतम ७ दिनभित्र दाबी गर्न सक्ने बोर्डले जानकारी दिएको छ ।

बोर्डले यस अघि सेवा प्रदायक संस्थालाई वैशाख महिनामा बीमितलाई उपलब्ध गराएको सेवा वापत दाबी गर्न बाँकी रकम जेठ १३ गतेसम्म दाबी गर्न भनेको थियो ।

बोर्डले बीमा सेवालाई प्रभावकारी, गुणस्तरीय तथा गुनाँसो रहित बनाउनका लागि सेवा प्रदायक संस्थालाई अनुरोध गर्दै आएको छ । बोर्डले जेठ दुई गतेदेखि बीमितलाई सामान्य/आकस्मिक रुपमा ओपिडिबाट वा प्रवाह गरेको हकमा सोही दिनमा नै दाबी गर्नु आग्रह गरेको छ । यदि बीमितलाई सामान्य/आकस्मिक रुपमा इन्डोरबाट भर्ना गरी सेवा प्रवाह गरेको हकमा भने बिरामी डिस्चार्ज हुँदाको दिनमै क्लेम गर्नुपर्ने छ ।
उक्त अनुसार सेवा प्रवाह गरेको दिनमै दाबी नगरेको क्लेम बीमा व्यवस्थापन सूचना प्रणालीले नै नलिने भन्दै सेवा प्रदायक संस्थालाई बोर्डले सूचित गर्दै आएको छ ।

बीमा कार्यक्रममार्फत पाँच जनासम्मको परिवारको तीन हजार ५०० बुझाएपछि त्यस घरमा रहेका सदस्यले एक लाख बराबरको औषधि उपचार सरकारले तोकेको अस्पतालमा निःशुल्क उपचार गर्न पाईन्छ । पाँच जनाभन्दा बढी सदस्य भएपछि प्रति सदस्यका दरले ७०० रुपैयाँ बुझाउनु पर्दछ । पाँच जनाभन्दा बढी सदस्यले प्रति सदस्य २० हजारदेखि दुई लाखसम्म निःशुल्क उपचार गर्न पाउने व्यवस्था छ ।

बोर्डले बीमा कार्यक्रमका लागि देशभरिका सरकारी र निजी गरी ३७५ अस्पताललाई सूचीकृत गरेको छ । ती अस्पतालमा उपचार बीमा लागू गरेका परिवारका सदस्यले एक लाख रुपैयाँसम्मको निःशुल्क उपचार सेवा पाउनेछन् ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।