बीमा कम्पनीको शेयरमा लगानीकर्ताको प्रवेश, नेप्सेमा ५३ अंकको वृद्धि हुँदा सूचक २९६० बिन्दुमा

कोभिड संक्रमणका बीच लगानीका क्षेत्र सुंकुचित भई शेयर बजारमा लगानी एकीकृत हुँदा शेयर बजारका लगानीकर्ताले एकपछि अर्को सेक्टरमा लगानी सिफ्ट गर्न थालेका छन् । यसै क्रममा मंगलबार फाइनान्स र विकास बैंकसँगै लगानीकर्ताको रोजाई बीमा कम्पनीको शेयरमा परेको छ ।

केही दिनअघि बैंकिङ्ग सेक्टरमा लगानीकर्ताको प्रवेश भएपनि बजारमा प्रयाप्त आपूर्ति रहेको कम्पनीको शेयरमूल्यमा मूल्य वृद्धि गर्न असम्भव प्रायः बनेपछि थोरै पूँजी भएका र सर्वसाधारणमा थोरै हिस्सा रहेको फाइनान्स, विकास बैंक र बीमा कम्पनीको सूचक बढाउने चलखेल सुरु भएको छ । कारोबारीहरुलाई मूल्यमा उतार चढाव ल्याउन कम आपूर्ति भएका कम्पनी सहज हुने हुँदा पनि यी कम्पनीको शेयरमूल्य पटक-पटक घटबढको अवस्था देखिन थालेको हो । पछिल्ला दिनमा मुख्यतः फाइनान्स र विकास बैंक र जलविद्युतको शेयरमूल्यमा तीव्र उतार चढाव आइरहेको छ ।

अर्कोतर्फ मंगलबार नेपाल धितोपत्र बोर्डको २९ औं वार्षिकोत्सव कार्यक्रममा अर्थमन्त्री विष्णुप्रसाद पौडेलले धितोपत्र बोर्डका अध्यक्षलाई बजेटमा घोषित वस्तु विनियम बजार सञ्चालनलाई अगाडि बढाउन र लगानीकर्ताको हीत संरक्षण गर्दै बोर्डको भुमिका सशक्त र प्रभावकारी बनाउन निर्देशन दिएका छन् । पूँजी बजारमैत्री अर्थमन्त्रीको रुपमा छबी बनाएका पौडेलको पूँजी बजारप्रतिको सकारात्मक दृष्टिकोणका कारण लगानीकर्ताको मनोबल उच्च भएको छ ।

बजारमा अन्य क्षेत्रमा लगानीको ठाउँ नहुँदा अहिले अधिक तरलताले शेयर बजारमा सोझो प्रभाव पारेको छ । जसले दैनिक १५ अर्बभन्दा बढीको शेयर खरीद बिक्री हुने अवस्था सिर्जना भएको छ ।

बजारमा आएको प्रयाप्त तरलताका कारण अर्थतन्त्रका सूचकमा उत्साहित वृद्धि नभएपनि शेयर बजारमा भने निरन्तर एकपछि अर्को रेकर्ड कायम हुन थालेको छ । यसै क्रममा मंगलबार नेप्से ५३.४४ अंकले बढेर हालसम्मकै उच्च बिन्दु २९६०.१४ अंकमा पुगेर बन्द भएको छ । यो सूचकका आधारमा ऐतिहासिक रेकर्ड समेत हो । 

कारोबार रकमका आधारमा भने जेठ २३ गते आइतबार सबैभन्दा धेरै रकम अर्थात १७ अर्ब २७ करोड १७ लाखको शेयर कारोबारको रेकर्ड कायम छ । यसअघि जेठ १६ गते आइतबार १७ अर्ब २ करोडको शेयर कारोबारमा भएको थियो। मंगलबार भएको कारोबार रकम हालसम्मकै तेस्रो ठूलो हो ।

मंगलबारको बजारमा २१८ वटा कम्पनीको ३ करोड ५७ लाख ३७४ कित्ता शेयर किनबेच हुँदा १६ अर्ब ९५ करोड रुपैयाँ माथिको कारोबार भएको छ । मंगलबार कारोबारमा आएका १३ समुहका सूचकमध्ये १० वटाको सूचक बढ्दा ३ वटाको मात्र सूचक घटेको छ । होटल एण्ट टुरिजम, माइक्रोफाइनान्स र इन्भेष्टमेण्ट सूचक मात्रै घटेको छ ।

आजको बजारमा विकास बैंक, फाइनान्सको सूचकमा धेरै बढेका छन् । डेभलपमेन्ट बैंकको सूचक ९.०४ प्रतिशत र फाइनान्सको सूचक ८.७१ प्रतिशतले बढेको छ । बीमा कम्पनीको शेयरमा लगानीकर्ताको प्रवेशले निर्जीवन बीमा कम्पनीको सूचक ३.७८ प्रतिशत र जीवन बीमा कम्पनीको सूचक ३.६५ प्रतिशतले बढोत्तरी भएको छ । यसदिन लगानीको सूचक ०.८८ प्रतिशत, होटल एण्ट टुरिजमको सूचक ०.४६ प्रतिशत र माइक्रोफाइनान्सको सूचक ०.४५ प्रतिशतले घटेको छ ।

आज तीन दर्जन कम्पनीको शेयर मूल्यमा सकारात्मक सर्किट लागेको छ । अधिकांश विकास बैंक र वित्त कम्पनीको शेयर मूल्यमा सकारात्मक सर्किट लागेको हो । हिमालयन जनरल इन्स्योरेन्स, गाखार्ज फाइनान्स, श्री इन्भेष्टमेण्ट एण्ड फाइनान्स, जानकी फाइनान्स, समृद्धि फाइनान्स, सांग्रिला डेभलपमेण्ट बैंक, मुक्तिनाथ विकास बैंक र ग्रीन डेभलपमेण्ट बैंकको शेयर मूल्य १० प्रतिशतले बढेको हो ।

मेरो माइक्रोफाइनान्स, हिमाल दोलखा हाइड्रो पावर, सामुदायिक लघुवित्त र मिथिला लघुवित्तको शेयरमूल्य २ प्रतिशतल धेरैले घटेको छ ।

आज सबैभन्दा धेरै नेपाल पुनर्बीमा कम्पनीको १ अर्ब ६ करोड ६४ लाख ६४ हजार ७२१ रुपैयाँको कारोबार भएको छ । नेपाल पुनर्बीमा कम्पनी पछि । रसुवागढी हाइड्रो पावर, यूनाइटेड मोदि हाइड्रोपावर, लुम्बिनी विकास बैंकको धेरै कारोबार भएको छ ।

रसुवागढी हाइड्रोपावर कम्पनीको ४७ करोड ८१ लाख रुपैयाँ, यूनाइटेड मोदी हाइड्रो पावर कम्पनीको ३७ करोड २२ लाख रुपैयाँ र लुम्बिनी विकास बैंकको ३५ करोड ६४ लाख रुपैयाँको शेयर कारोबार भएको छ ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।