तामाकोशीको बिजुली न्यू खिम्ती सबस्टेसनमा जोडिँदै, असारभित्रै १५२ मेगावाट उत्पादन हुने

राष्ट्रिय गौरवको अपर तामाकोशी जलविद्युत आयोजनाको परीक्षण उत्पादनको कार्य सकिएपछि आयोजनाबाट उत्पादित बिजुली खिम्तीको नयाँ सबस्टेशनमार्फत नै तामाकोशीको बिजुली राष्ट्रिय प्रसारणमा जोडिने भएको छ ।

बिजुली जडानका लागि आइतबारदेखि (असार १३ गतेदेखि १९ गते) शनिबारसम्म खिम्ती लामोसाँघु १३२ केभी प्रसारण लाइन बन्द गरेर अपर तामाकोशी जलविद्युत आयोजनालाई राष्ट्रिय विद्युत प्रणालीमा जोड्न लागिएको हो ।

नेपाल विद्युत प्राधिकरणले अपर तामाकोशी जलविद्युत जडानका लागि एक साताका लागि ढल्केबरदेखि कोहलपुर सम्मकका सबस्टेसनहरुबाट विद्युत आपूिर्त हुने क्षेत्रमा औद्योगिक ग्राहकहरुको छोटो समय विद्युत कटौती हुने सक्ने जनाएको छ । यद्यपी सो समयमा कुलेखानी जलासशयको पानी प्रयोग गरी विद्युत कटौतीको समय कम गर्न प्रयास गरिने प्राधिकरणले जनाएको छ ।

तामाकोशी करिडोरबाट उत्पादन हुने बिजुली अब खिम्तीमा बनाइएको नयाँ सबस्टेशन मार्फत राष्ट्रिय प्रसारण लाइनमा जोडिनेछ ।  खिम्ती लामोसाँघुबाट प्रसारण हुने बिजुली ढल्केबर पठाएर वैकल्पिक माध्यमबाट काठमाडौं ल्याउने तयारी नेपाल विद्युत प्राधिकरणले गरेको छ ।

तामाकोशी जलविद्युत् आयोजनाले पहिलो युनिटपछि हरेक साता अर्को युनिटबाट उत्पादन गर्ने तयारी गरेको छ । यसअनुसार यही असार मसान्तभित्रै १५२ मेगावाट विद्युत् उत्पादन गर्ने भएको छ । आयोजनामा कूल ६ युनिट रहेका छन् ।

आयोजनाका प्रवक्ता डा. गणेश न्यौपानेका अनुसार पहिलो चरणमा पहिलो युनिटको परीक्षण सम्पन्न भइसकेको छ । असार मसान्तभित्रै आयोजनाका दुई युनिटबाट बिजुली उत्पादन गर्ने गरी आवश्यक तयारी अन्तिम चरणमा पुगेको हो ।

कूल ४५६ मेगावाट क्षमताको सो आयोजना निर्माण शुरु हुँदा ब्याज सहित ५१ अर्बमा सकाउने लक्ष्य राखिएपछि समयावधि बढ्दा आयोजनाको लागत बढेर ८० अर्ब हारहारीमा पुगेको छ । प्राकृतिक विपत्ति २०७२ को महाभुकम्प, अमेरिकी डलरमा आएको उतारचढाव, कोभिड १९ तथा अनेकन समस्याले गर्दा आयोजनाको लागत उल्लेख्य बढेको हो ।

पछिल्लो पटक प्राधिकरणका कार्यकारी निर्देशक हितेन्द्रदेव शाक्य आयोजनास्थल पुगेर आवश्यक निर्देशन तथा बिजुली उत्पादनको तयारीका बारेमा जानकारी लिएको थिए । यसअघि पूर्वकार्यकारी निर्देशक कुलमान घिसिङले हरेक महिना आयोजनास्थल पुगेर समस्या समाधानमा सहजीकरण गरेका थिए ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।