पन्ध्र करोड मागदाबी सहित राजस्व चुहावटमा मुद्दा दायर

राजस्व अनुसन्धान कार्यालय बुटवलले एभरेष्ट मोवाइल सेन्टरका प्रोपराइटर विष्णु ज्ञवाली उपर १४ करोड ७५ लाख रुपैयाँको मागदाबी लिएर उच्च अदालत तुल्सीपुर बुटवलमा सोमबार मुद्दा दायर गरेको छ ।

रुपन्देही, जिल्ला सिद्धार्थनगर नगरपालिका वडा नं. ९ रुपन्देही स्थायी ठेगाना भएका एभरेष्ट मोवाइल सेन्टरका प्रोपराइटर ज्ञवालीले मोबाईलजन्य मालवस्तुहरुको बिजक जारी नगरी तथा भन्सार चोरी पैठारी गरी राजस्व चुहावट गरेको विभागले जनाएको छ ।

कार्यालयका अनुसार फर्ममा रहेका मोबाईलजन्य मालवस्तुहरुको भौतिक गणना गर्दा देखिएको मौज्दात र बिक्रीको विवरण फरक देखिएको, निजले पेश गरेको वित्तीय विवरण र आय विवरणमा बिक्री आय लुकाएको, मालवस्तु विक्री गर्दा बिल बिजक जारी नगरी न्यून मौज्दात देखाएको थियो ।

अनुसन्धानका क्रममा उनको पसलबाट भन्सार चोरी पैठारी गरी मालवस्तुको अधिक मौज्दात देखाई निज प्रतिवादीले अवैध (लुज) बिल बिजकबाट मालवस्तु खरिद र बिक्री गरी वास्तविक बिक्री आय लुकाएको, बिल बिजक जारी नगरी मालवस्तु बिक्री गरिएको तथा भन्सार चोरी पैठारी गरी राजस्व चुहावट गरेको पाईएको विभागले जनाएको छ ।

ज्ञवाली उपर आव २०७३/७४ देखि २०७५/७६ सम्मको अवैध (लुज) बिलबाट कायम गरिएको बिक्रीतर्फ, अधिक मौज्दातबाट ७ करोड ३७ लाख ७५ हजार ५७६ रुपैयाँ कायम भएको बिगो कायम गरी राजस्व चुहावट (अनुसन्धान तथा नियन्त्रण) (पहिलो संशोधन) ऐन, २०५२ बमोजिम कायम भएको विगोको शत प्रतिशत जरिवाना तथा ३ वर्षसम्म कैद सजायको मागदावी गरी अभियोग पत्र दायर गरिएको कार्यालयले जनाएको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।