एनआईसी एशिया लघुवित्तको मर्जर सिनर्जीले नाफामा आकर्षक वृद्धि

स्वदेशी लघुवित्तसँग मर्जर सम्पन्न गरी गत आर्थिक वर्षबाट एकीकृत कारोबार गरेको एनआईसी एशिया लघुवित्त वित्तीय संस्था लिमिटेड (NICLBSL) को खुद नाफामा मर्जरको सिनर्जी इफेक्ट देखा परेको छ ।

अघिल्लो आवमा १७ करोड ५६ लाख ५४ हजार खुद नाफा गरेको लघुवित्तले समीक्षा अवधिमा २२१.४९ प्रतिशतले खुद नाफा बढाएर २०७८ असारसम्ममा ५६ करोड ४७ लाख ६ हजार रुपैयाँ खुद नाफा आर्जन गरेको छ ।

समीक्षा अवधिमा १७.५३ प्रतिशतले चुक्ता पूँजी बढेर १ अर्ब ७३ करोड ९४ लाख रुपैयाँ पुगेको लघुवित्तको प्रतिशेयर आम्दानी २०.६० रुपैयाँ बढेर ३२.४६ रुपैयाँ पुगेको हो । लघुवित्तको प्रतिशेयर नेटवर्थ १५३.५४ रुपैयाँ र मूल्य आम्दानी अनुपात ४७.५८ गुणा छ ।

अघिल्लो आवको तुलनामा गत आवमा लघुवित्तको जगेडा कोष २३३.५६ प्रतिशत, निक्षेप १८०.२४ प्रतिशत, सापटी १६७ प्रतिशत, कर्जा लगानी १४०.०५ प्रतिशत खुद ब्याज आम्दानी १७५.९३ प्रतिशत, सञ्चालन नाफा २२९.२० प्रतिशतले बढेको छ ।

२०७८ असार मसान्तसम्ममा लघुवित्तले २ अर्ब ६७ करोड ७९ लाख रुपैयाँ निक्षेप संकलन, १५ अर्ब ५९ करोड ७० लाख सापटी लिएर १६ अर्ब ८९ करोड १६ लाख रुपैयाँ कर्जा लगानी गरेको छ । यसबाट लघुवित्तले १ अर्ब ३१ करोड ८२ लाख ५७ हजार रुपैयाँ खुद व्याज आम्दानी गर्दा कम्पनी ८४ करोड ७२ लाख २१ हजार रुपैयाँ सञ्चालन नाफामा छ ।

संस्थाको जगेडा कोषमा ९३ करोड ५२ लाख रुपैयाँ सञ्चित छ । अघिल्लो आवमा २८ लाख ३ हजार रुपैयाँ थियो । लघुवित्तको खराब कर्जा अनुपात ०.०६ बिन्दुले घटेर ०.९३ प्रतिशतमा झरेको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।