मानुषी लघुवित्तको आईपीओ साढे १८ लाखले भरे, तीन दिनमै ६५ गुणा बढी शेयर माग

मानुषी लघुवित्त वित्तीय संस्थाको प्राथमिक शेयर (आईपीओ) मा शुक्रबारसम्म अर्थात तीन दिनमा साढे १८ लाख आवेदकले आवेदन दिएका छन्।

लघुवित्तको बिक्री प्रबन्धक एसबिआई मर्चेण्ट बैंकिङ्ले दिएको जानकारी अनुसार शुक्रबार बेलुका ५ बजेसम्ममा कम्पनीको आईपीओमा १८ लाख ५६ हजार ५५० जनाले आवेदन गरेका छन् ।

उल्लेखित आवेदनबाट २ अर्ब ४० करोड ३४ लाख १५ हजार रुपैयाँ बराबरको २ करोड ४० लाख ३४ हजार १५० कित्ता शेयर खरिदको लागि आवेदन परेको हो । यो माग लघुवित्त कम्पनीले सर्वसाधारणमा बिक्रीमा ल्याएको शेयरको तुलनामा ६५.२१ गुणा धेरै हो ।

लघुवित्तले बुधबारदेखि जारी पूँजीको ३६ प्रतिशतले हुन आउने ३ करोड ९३ लाख ७५ रुपैयाँ बराबरको ३ लाख ९३ हजार ७५० कित्ता शेयर निष्काशनमा ल्याएको हो। त्यसमध्ये ०.५ प्रतिशत आर्थत ५ हजार ४६९ कित्ता शेयर कर्मचारीहरुलाई र ५ प्रतिशत अर्थात १९ हजार ६८८ कित्ता शेयर सामुहिक लगानी कोषका लागि सुरक्षित गरी बाँकी ३ लाख ६८ हजार ५९३ कित्ता शेयरका लागि सर्वसाधारणबाट आवेदन माग गरिएको थियो ।

कम्पनीको आईपीओमा नेपाल धितोपत्र बोर्डबाट अनुमति प्राप्त आश्वा सदस्य बैंक तथा वित्तीय संस्थाहरू र मेरो शेयरको वेब तथा एप मार्फत पनि आवेदन दिन सकिनेछ। लघुवित्तको आईपीओमा साउन ३१ गतेसम्म आवेदन दिन सकिनेछ।

लघुवित्तको अधिकृत पूँजी एक २० करोड रुपैयाँ, जारी पूँजी १० करोड रुपैयाँ र चुक्ता पूँजी ७ करोड रुपैयाँ रहेको छ। सर्वसाधारणलाई ३ करोड ९३ लाख ७५ हजार रुपैयाँ बराबरको आईपीओ निष्काशनपछि लघुवित्तको चुक्ता पूँजी १० करोड ९३ लाख ७५ हजार रुपैयाँ पुग्नेछ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।