साउनमा पौने ३ अर्बको जीवन बीमा व्यवसाय विस्तार, नवीकरण बीमाशुल्क साढे १३ अर्बमाथि

जीवन बीमा कम्पनीले चालु आर्थिक वर्ष २०७८/८९ को पहिलो महिना (साउन) मा २ अर्ब ७४ करोड रुपैयाँको नयाँ जीवन बीमा व्यवसाय विस्तार गरेका छन् ।

बीमा समितिले उपलब्ध गराएको तथ्यांकअनुसार नेपाल लाइफ इन्स्योरेन्सले सबैभन्दा धेरै प्रथम बीमाशुल्क संकलन गर्न सफल भएको छ । नेपाल लाइफले यस अवधिमा ५८ करोड रुपैयाँ बीमाशुल्क उठाएको छ ।

नेपाल लाइफ पछि नेशनल लाइफ, प्रभु र युनियन लाइफ इन्सयोरेन्सले धेरै नयाँ व्यवसाय विस्तार गरेका छन् । नेशनलले २५ करोड, प्रभुले २३ करोड र युनियनले १९ करोड रुपैयाँ प्रथम बीमाशुल्क संकलन गरेका छन् ।

सबैभन्दा थोरै नयाँ व्यवसाय विस्तार गर्ने कम्पनीमा राष्ट्रिय बीमा संस्थान, सानिमा लाइफ, गुराँस लाइफ र प्राइम लाइफ परेका छन् । यी कम्पनीले ५/५ करोड रुपैयाँ मात्रैको नयाँ व्यवसाय विस्तार गरेका छन् ।

प्रथम बीमाशुल्क के हो ?

प्रथम बीमाशुल्क भनेको कम्पनीहरुले नयाँ ग्राहकहरुबाट संकलन गर्ने पहिलो प्रिमियम (एफपिआर) रकम हो । यसरी बीमा कम्पनीहरुले बिक्री गरेको सुरुवातको किस्ता वापत प्राप्त हुने रकम नै प्रथम बीमाशुल्क हो ।

बीमा कम्पनीहरुमा ग्राहकले बीमालेख खरीद गर्दा सुरुमा पहिलो किस्ता वापतको प्रिमियम तिर्छन् । त्यस्तै, थप प्रिमियम भने १ महिना ३ महिना, ६ महिना वा १ वर्षमा तिर्ने गरी खरीद गरेका हुन्छन् । बीमा कम्पनीहरुले दोस्रो वा सो भन्दा पछि संकलन गर्ने बीमाशुल्कलाई भने नवीकरण बीमाशुल्क भनिन्छ ।

यसरी पहिलो किस्ता (प्रथम बीमाशुल्क) वापत संकलन हुने प्रिमियम र नविकरण बीमा वापत प्राप्त हुने प्रिमियम शुल्कलाई जीवन बीमा कम्पनीहरुको वित्तीय विवरणमा देखाउने तरिका फरकरफरक हुन्छ ।

नवीकरण बीमाशुल्क वापत कम्पनीले उठाए १३ अर्ब

चालु आवको पहिलो महिनामा १९ जीवन बीमा कम्पनीले नवीरकण बीमाशुल्क वापत १३ अर्ब ७८ करोड रुपैयाँ संकलन गरेका छन् ।

यस अवधिमा उक्त शिर्षकबाट सबैभन्दा धेरै रकम नेपाल लाइफले उठाएको छ । नेपाल लाइफले नवीकरण बीमाशुल्क वापत ४ अर्ब १८ करोड रुपैयाँ उठाएको छ ।

राष्ट्रिय बीमा संस्थानले ३ अर्ब ६८ करोड रुपैयाँ र नेशनल लाइफले एक अर्ब ८ करोड रुपैयाँ नवीकरण बीमाशुलक संकलन गरेका छन् ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।