तीन दिनमा २०४ अंकले घट्यो नेप्से, फाइनान्स सूचक ७ प्रतिशत धेरै घट्दा अन्य के-के भयो ?

शेयर बजार सूचक मापक नेप्से पछिल्लो तीन दिनमा मात्रै २०४.३३ अंकले घटेको छ । साताको पहिलो कारोबार दिन आइतबार ६१.२७ अंकले घटेको नेप्से सोमबार ७३.०५ र मंगलबार ७०.०१ अंकले घटेर बन्द भएको हो ।

निरन्तरको गिरावटसँगै मंगलबार नेप्से २६१५.४० अंकमा झरेको छ । ठूला कम्पनीहरुको सूचक माप सेन्सेटिभ ११.४२ अंकले घटेर ४९४.९१ बिन्दुमा ओर्लिएको छ ।

दिनभर २१८ कम्पनीका १ करोड ३० लाख ३४ हजार ८२८ कित्ता शेयर ७५ हजार ३७४ वटा संख्यामा खरीद बिक्री हुँदा कारोबार रकम ५ अर्ब ७४ करोड ५४ लाख ८८ हजार १७९ रुपैयाँ पुगेको छ ।  कारोबारमा आएका १३ वटै सूचक रातम्य बनेका छन् । फाइनान्स सर्वाधिक ७.३७ प्रतिशतले घट्दा जलविद्युत ४.७४ प्रतिशत र लगानी ३.९३ प्रतिशतले घटेको छ ।

पछिल्लो समय शेयर बजारबाट ठूला लगानीकर्ता बाहिरिएका छन् भने कोभिड संक्रमणको दर घट्दै गएपछि आर्थिक गतिविधि बढ्दा अन्य क्षेत्रबाट शेयर बजारमा आएको पार्किङ मनि पनि बाहिरिएको अवस्था छ । बढ्दो ब्याजदर र नेपाल राष्ट्र बैंकको मार्जिन कर्जामा लागू गरिएको ४।१२ करोडको सीमाले पनि बजारलाई वियरिस प्रवृत्तितिर धकेलेको छ । यसले आम अपेक्षा विपरित लाभांश सिजनमा नै बजार निरन्तर घट्दो क्रममा देखिएको छ ।

कुमारी बैंकको सर्वाधिक कारोबार

मंगलबार कुमारी बैंकको सबैभन्दा धेरै १८ करोड ८२ लाख रुपैयाँको शेयर कारोबार भएको छ । बैंकको ६ लाख ११ हजार ४८४ कित्ता शेयर ३ हजार ३८४ वटा संख्यामा कारोबार भएको छ । बैंकले ६ प्रतिशत बोनस र २.६७ प्रतिशत नगद मात्र लाभांश प्रस्ताव गरेपछि बैंकको शेयरमूल्य मंगलबार प्रतिकित्ता २६ रुपैयाँले घटेर ३०३ रुपैयाँमा झरेको छ ।

यस्तै हिमालयन डिष्टिलरी, नेशनल हाइड्रोपावर, आइसिएफसि फाइनान्स, एनआईसी एशिया बैंक, नेपाल बैंक, अपि पावर, अरुण भ्याली, अरुण काबेली पावर, र नबिल बैंकको उच्च कारोबार भएको छ ।

दशौं ठूलो कारोबार भएको नबिल बैंकको १२ करोड ७ लाख रुपैयाँको शेयर खरीद बिक्री भएको छ ।

दुई कम्पनीको शेयरमूल्यमा सकारात्मक सर्किट

समग्र नेप्से २.६१ प्रतिशतले घटेपनि धितोपत्रको दोस्रो बजारमा हालै मात्र कारोबार खुलेका मनकामना स्मार्ट लघुवित्त, र मैलुङ्गखोला जलविद्युत कम्पनीको शेयरमूल्यमा सकारात्मक सर्किट लागेको हो । मंगलबारको सर्किटपछि मनकामना स्मार्टको प्रतिकित्ता शेयरमूल्य १ हजार ७५३ रुपैयाँ र मैलुङ्गखोला जलविद्युतको प्रतिकित्ता २४८.८० रुपैयाँ पुगेको छ ।

आजको बजारमा मेगा बैंक, बोर्टलर्स नेपाल (तराई), सनराइज डिबेञ्चर २०८०, ओरियन्टल होटल, एनआईबिएल समृद्धि फण्ड १ को इकाईमूल्य १ प्रतिशतभन्दा धेरैले बढेको छ ।

सात कम्पनीको मूल्य ९ प्रतिशत धेरै घट्यो

मंगलबारको कारोबारमा ९ वटा कम्पनीको शेयरमूल्य ९ प्रतिशतभन्दा धेरैले घटेको छ । जसमा जलविद्युत कम्पनीहरु अग्रस्थानमा रहेका छन् । यसदिन नेपाल हाइड्रो डेभलोपर र हिमालयन पावर पार्टनरको शेयरमूल्यमा नकारात्मक सर्किट लागेको छ ।

यस्तै गोर्खाज फाइनान्स, जोशी हाइड्रोपावर, श्री इन्भेष्टमेन्ट फाइनान्स, शिवश्री हाइड्रोपावर र समृद्धि फाइनान्सको शेयरमूल्य ९ प्रतिशतभन्दा धेरैले घटेको हो । घलेम्दी हाइड्रोपावर, नेपाल फाइनान्स र जानकी फाइनान्सको शेयर लगानीकर्ताले पनि पौने ९ प्रतिशतले गुमाएका छन् ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।