ब्रोकर डेटा सेन्टरको समस्या आउँदा अझै कारोबार सुचारु भएन, साढे एक अर्बभन्दा कम कारोबार

ब्रोकरहरुको डेटा सेन्टरमा प्राविधिक कारणले गडबडी आएपछि कारोबारको दुई घण्टा नबित्दै बन्द भएको सेयर कारोबार अझै सुचारु हुन सकेको छैन ।

डेटा सेन्टरको समस्याका कारण नेपाल स्टक एक्सचेन्जले केही समयका लागि सेयर कारोबार रोक्नुपरेको बताएपनि साढे चार बजेसम्म पनि कारोबार सुचारु हुन सकेको छैन । डेटा सेन्टरको समस्याका कारण दिउँसो १२ बजेर ५३ मिनेटपछि कारोबारमा समस्या देखिएको थियो ।

कारोबार रोकिँदासम्म नेप्से ०.११५ अंकले बढेर २६६८.११ बिन्दुमा पुगेको छ भने सेन्सेटिभ इन्डेक्स ०.०५ अंकले घटेर ५०९.८५ बिन्दुमा झरेको छ । करिब २ घण्टा अवधिमा २२० कम्पनीका २३ लाख ४९ हजार १० कित्ता सेयर १८ हजार ५९७ पटक खरीद बिक्री हुँदा कारोबार रकम १ अर्ब ३४ करोड २२ लाख ३२ हजार रुपैयाँमा समेटिएको छ ।

आज कारोबारमा आएका १३ मध्ये ६ सूचकहरु वाणिज्य बैंक, विकास बैंक, अन्य, माइक्रोफाइनान्स, जीवन बीमा, निर्जीवन बीमाको सूचक हरियो छन् भने बाँकी ७ सूचक रातो छन् ।

कारोबार भएको समयसम्म राष्ट्र उत्थानको सर्वाधिक ६.१० प्रतिशतले मूल्य बढ्दा इमर्जिङ्ग नेपालको ४.०२ प्रतिशत र कर्पोरेट डेभलपमेन्ट बैंकको ३.७५ प्रतिशत, स्वामलम्बन लघुवित्तको ३.२५ प्रतिशतले बढेको छ ।

यस अवधिमा सानिमा लार्ज क्याप फण्डको सर्वाधिक ५.७३ प्रतिशतले घटेको छ । युनाइटेड इदिमर्दी ३.९१ प्रतिशत, साल्ट ट्रेडिङ्ग ३.७४ प्रतिशत, गुराँस लघुवित्त ३.४८ प्रतिशत, र मैलुङ्ग खोला जलविद्युत कम्पनी ३.४८ प्रतिशतले घटेको छ ।

दुई घण्टा अवधिमा नेपाल लाइफको सर्वाधिक ६ करोड ६५ लाख रुपैयाँको सेयर कारोबार भएको छ । लाइफ इन्स्योरेन्स कर्पोरेसन ६ करोड १८ लाख, अपि पावर ५ करोड ४५ लाख र हिमालयन डिष्टिलरीको ५ करोड बढीको सेयर कारोबार भएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।