राजनैतिक अस्थीरताको संकेतले सेयर बजारमा ४० अंकको गिरावट

अमेरिकी सहयोग सम्बन्धी सम्झौता मिलेनियम च्यालेन्ज कम्प्याक्ट (एमसीसी) को विषयलाई लिएर सत्तारुढ पाँचदलीय गठबन्धन नै धरासायी हुने संकेतले मुलुको सेयर बजारमा प्रत्यक्ष असर परेको छ ।

एमसीसीकै कारण देश फेरि राजनैतिक अस्थीरतातर्फ जाने संकेतले आइतबार सेयर बजार ४०.५७ अंकले घटेर २८३६.१७ बिन्दुमा झरेको छ । कारोबारमा आएका सबै उपसमुहगत सूचक ऋणात्मक भएपछि बजारमा भारी गिरावट आएको हो । बजार सुरु भएदेखि नै घट्न थालेको बजारमा बिक्री चाप अधिक रहँदा त्यसपछि निरन्तर घटेर नै बन्द भएको हो ।

मिडियामा आइतबार बिहानै प्रधानमन्त्री सेरबहादुर देउवा र प्रचण्डले एमसीसीलाई पठाएको पत्र सार्वजनिक र सोही पत्र कार्यान्वयन गर्न भन्दै एमसीसीले पनि देउवा र प्रचण्डलाई पठाएको जवाफी पत्र सार्वजनिक भएपछि सत्तारुढ दलहरुको गठबन्धक भत्कने अवस्थामा पुगेको छ ।

दलहरुले मागेको समय घर्किन लागेको स्मरण गराइएको पत्रले जसरी पनि एमसीसी अनुमोदन गर्नुपर्ने दबाबमा रहेको प्रधानमन्त्री देउवा र विद्यमान व्यवस्थामा संसोधन नभई पारित गर्न नहुने पक्षमा सत्तारुढ दल एकीकृत समाजवादी र माओवादी केन्द्रको अडानले राजनैतिक वृत्तसँगै आइतबारको सेयर बजार पनि प्रभावित भएको हो ।

आइतबार २२८ कम्पनीका १ करोड ६ लाख ५१ हजार ७५४ कित्ता सेयर सेयर ७३ हजार १९२ वटा संख्यामा खरीद बिक्री हुँदा कारोबार रकम ५ अर्ब ८३ करोड ६४ लाख १४ हजार ५१० रुपैयाँ पुगेको छ ।

यस्तै, ठूला कम्पनीको सेयर कारोबार मापन गर्ने सेन्सेटिभ परिसूचक ७.७३ अङ्कले घटेर ५३१.९२ मा ओर्लेको छ ।साताको पहिलो दिनको कारोबारपछि बजार पूँजीकरण ४० खर्ब आठ अर्ब ५५ करोड ७२ लाख ९० हजार रूपैयाँ छ ।

तेह्र वटै उपसमुहगत सूचक घटेकोमा सबैभन्दा धेरै बजार पूँजीरकण रहेको नेपाल लाइफलको लाभांश उच्च घट्दा जीवन बीमाको सूचक पनि सर्वाधिक ३.५७ प्रतिशतले घटेको छ । यस्तै फाइनान्स सर्वाधिक २.४१ प्रतिशत तथा बैंकिङ्ग, ब्यापार, विकास बैंक, जलविद्युत, अन्य, लघुवित्त र लगानी सूचक समेत १प्रतिशत धेरैले घटेको छ ।

यसदिन कारोबार रकमका आधारमा अरुण भ्याली हाइड्रोपावरको सबैभन्दा धेरै कारोबार भएको छ । कम्पनीको ९ लाख ८६३ कित्ता सेयर ५४ करोड ४९ लाख ९३ रुपैयाँमा कारोबार भएको छ ।

यस्तै नेपाल लाइफ ४२.४७ करोड, अपि पावर २५.९५ करोड, अपर तामाकोशी २२.३८ करोड र एचआईडिसीएलको २०.४७ करोड रुपैयाँ बराबरको सेयर कारोबार भएको छ । सिनर्जी पावर, अरुण काबेली पावर, शिखर इन्स्योरेन्स र नेपाल टेलिकम पनि शीर्ष कारोबार हुने दश कम्पनीमा समेटिएका छन् । दशौं ठूलो कारोबार भएको नेपाल टेलिकमको १३.४९ करोडको सेयर कारोबार भएको छ ।

यसदिन नेपाल हाइड्रो डेभलोपर लिमिटेडको सबैभन्दा धेरै ८.०८ प्रतिशतले मूल्य बढेको छ । यस्तै एनआरएन इन्फ्रास्टक्चर लिमिटेड, शिखर इन्स्योरेन्स र साहस उर्जाको सेयरको भाउ २ प्रतिशत बढीले उकालो लागेको छ ।

कारोबारीको तीव्र चलखेलका कारण उचालिएको विन लघुवित्तको सेयरमूल्यमा आइतबार नकारात्मक सर्किट लागेर घटेको छ । लघुवित्तको सेयरमूल्य प्रतिकित्ता १९५.९० रुपैयाँले घटेर १७६३.३० मा झरेको छ । प्रतिसेयर २९ रुपैयाँ ऋणात्मक रहेको लघुवित्तको सेयर कारोबारीले कम पूँजी भएका कारण पम्प एण्ड डम्पको अभ्यास गरेका हुन् । यस लघुवित्तको सेयर खरीद गरेका लगानीकर्ताले अब वर्षैसम्म घाटा ब्यहोर्नुपर्ने देखिन्छ ।

यसैगरी अघिल्लो आवको ३१ प्रतिशत बोनस सहित ५१ प्रतिशत लाभांश दिएको नेपाल लाइफले आव २०७६।७७ बाट १४ प्रतिशत बोनस सेयर र कर प्रयोजनका लागि मात्रै नगद दिएपछि कम्पनीको सेयरको भाउ ७.६१ प्रतिशत अर्थात १२५ रुपैयाँ घटेर १५०६ रुपैयाँमा झरेको छ ।

यस्तै बुद्धभुमी हाइड्रोपावर ६.४५ तथा तेह्रथुम पावर, छ्याङ्दी हाइड्रोपावर, हिमालयन उर्जा विकास कम्पनी, सिइडिबी हाइड्रोपावर, सिंगटी हाइड्रोपावर, र गुहेश्वरी मर्चेन्टको सेयरमूल्य पनि ४ प्रतिशतभन्दा बढीले घटेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।