लघुवित्तको हटकेक जीवन विकासको EPS ४७ रुपैयाँले घट्यो

पछिल्लो समय लघुवित्त कम्पनीहरुमध्ये सेयरमूल्यसँगै अन्य थुप्रै सूचांकमा अग्र स्थानमा रहेको हटकेक स्टक जीवन विकास लघुवित्त वित्तीय संस्था लिमिटेडको वार्षिक प्रतिसेयर आम्दानी ४७ रुपैयाँ बढीले घटेको छ ।

गत आवको यहि अवधिको तुलनामा आईपीओ जारीपछि कम्पनीको पूँजी ४८.१५ प्रतिशतले बढेर ६० करोड ८४ लाख पुगेको छ । पूँजी बढेको अनुपातमा लघुवित्तको खुद नाफा बढ्न नसकेपछि वार्षिक प्रतिसेयर आम्दानी ४७.२७ रुपैयाँ घटेर १३२.०४ रुपैयाँमा झरेको छ । गत आवको यहि अवधिमा १७९.३० रुपैयाँ रहेको थियो ।

आज सार्वजनिक चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण अनुसार लघुवित्तको खुद नाफा गत आर्थिक वर्षको सोही अवधिको तुलनामा ९.१० प्रतिशत मात्र बढेको छ ।

पुससम्म लघुवित्तले ४० करोड १६ लाख ५८ हजार रुपैयाँ खुद नाफा आर्जन गरेको छ । गत आर्थिक वर्षको सोही अवधिमा लघुवित्तले ३६ करोड ८१ लाख ७२ हजार रुपैयाँ खुद नाफा कमाएको थियो ।

चालु आर्थिक वर्षको पहिलो ६ महिनासम्ममा लघुवित्तको खुद ब्याज आम्दानी र सञ्चालन मुनाफा पनि बढेको छ । लघुवित्तको खुद ब्याज आम्दानी ३२.६५ प्रतिशत र सञ्चालन मुनाफा ४४३.२२ प्रतिशत बढेको हो । लघुवित्तको खुद ब्याज आम्दानी ८० करोड ३० लाख १४ हजार र सञ्चालन नाफा ४१ करोड ५३ लाख ७९ हजार रुपैयाँ रहेको छ ।

चालु आर्थिक वर्षको पुस मसान्तसम्ममा लघुवित्तले ८ अर्ब ८२ करोड ४१ लाख रुपैयाँ निक्षेप संकलन तथा बैंक तथा वित्तीय संस्थाबाट १० अर्ब ४३ करोड ५ लाख रुपैयाँ सापटी लिएर २२ अर्ब ८२ करोड ११ लाख रुपैयाँ कर्जा लगानी गरेको छ । समीक्षा अवधिमा लघुवित्तको लघुवित्तको निक्षेप संकलन १७.०६ प्रतिशत, सापटी १७.२४ प्रतिशत र कर्जा लगानी २५.५४ प्रतिशत बढेको छ ।

पुससम्म सम्भावित कर्जा नोक्सनीमा २४ करोड २१ लख रुपैयाँ व्यवस्था गरेको कम्पनीले १९ करोड ८३ लाख रुपैयाँ खराब कर्जा उठाएको छ । समीक्षा अवधिमा लघुवित्तको जगेडा कोष ७४.४० प्रतिशतले बढेर १ अर्ब ७२ करोड २१ लाख ९० हजार रुपैयाँ पुगेको छ ।

यस अवधिमा लघुवित्तको खराब कर्जा अनुपात ०.७५ प्रतिशत, कस्ट अफ फण्ड ९.२४ प्रतिशत, प्रतिशेयर नेटवर्थ ३८३.०७ रुपैयाँ र सेयरमूल्य ४ हजार ६६६ रूपैयाँ हाराहारीमा रहेकाेमा मूल्य आम्दानी अनुपात ३४.२३ गुणा छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।