सरकारले लिने नीतिले मुलुकको समृद्धि तथा आर्थिक विकासमा महत्वपूर्ण प्रभाव पार्छः ढकाल

आइएमई ग्रुपका संस्थापक चन्द्रप्रसाद ढकालले सरकारले लिने सही नीतिले मुलुकको समृद्धि तथा आर्थिक विकासमा महत्वपूर्ण प्रभाव पर्ने बताएका छन् ।

आइएमई ग्रुप अन्तर्गतको रेमिट्यान्स कम्पनी आइएमई लिमिटेडको २२ औं वार्षिकोत्सवलाई सम्बोधन गर्दै ढकालले आर्थिक विकासका लागि सरकारसँग मिलेर आफूहरु काम गरिरहेको उल्लेख गरे ।

उनले बजेटमा आएका विषयहरु कार्यान्वयनमा जाने हो भने देशको आर्थिक गतिविधि बढ्ने सुझाव दिए ।

कार्यक्रममा उनले एउटा कोठाबाट शुरु भएको आइएमई ग्रुपले ४० हजारलाई प्रत्यक्ष, अप्रत्यक्ष रोजगारी दिने अवस्थामा पुगेको बताए । आफूहरुले संस्था सुरु गर्ने बेला विदेशी मुद्रा भित्र्याउन राष्ट्र बैंकले गरेको नीतिगत प्रावधानले सहज भएको उनले जानकारी दिए ।  अनौपचारिकरुपमा भित्रिँदै आएको विप्रेषण सुरुआती चरणमा आफूहरुकै पहल मार्फत औपचारिक रुपमा आउन थालेको तथ्य पेश गरे ।

नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकालले भने, “रेमिट्यान्सलाई उत्पादनमूलक क्षेत्रमा लगाउनुपर्छ, रोजगारीको विकास र विस्तारका लागि प्रयोग गर्नुपर्छ ।” विदेशमा रहेका नेपालीहरुको साथका कारण क्षेत्रपाटीको एउटा कोठाबाट सुरु भएको आईमएई यो अवस्थासम्म आइपुग्दा खुसी लागेको बताए । सुरुवाती चरणमा अफिस, किचन र बेडरुमसमेत एकैठाउँमा राखेर सुरु गरेको उनले सम्झिए ।आईमएई यो सफलता आफ्नो परिवारको मात्र नभई आम नेपाली र विशेषगरीविदेशमा रहेका नेपालीहरुलाई श्रेय जाने उनले बताए ।

इन्टरनेसनल मनी एक्सप्रेस (आइएमई) लिमिटेडले पछिल्ला दिनमा वार्षिक रुपमा एक खर्ब वा सोभन्दा बढी विप्रेषण भित्र्याएर मुलुकको आर्थिक समृद्धिमा योगदान पुर्‍याएको छ । पछिल्ला दिनमा विप्रेषण भित्रनेक्रम पनि उत्तिकै बढेको छ । नेपाल राष्ट्र बैंकका अनुसार चालू आवको १० महिनामा मात्रै कूल ८ खर्ब ११ अर्ब ७९ करोड बराबरको विप्रेषण आप्रवाह भएको छ । तर देशभित्र भित्रिएको विप्रेषण अनुत्पादक क्षेत्रमा मात्रै खर्च भइरहेको र त्यसले आर्थिक विकासमा ध्यान दिन नसकेको टिप्पणी भइरहेको छ ।

आइएमईले आफ्नो २२ औँ वार्षिकोत्सवका अवसरमा शनिबार बिहान प्रभातफेरी कार्यक्रमको आयोजना गरेको थियो । केन्द्रीय कार्यालय पानीपोखारीबाट सुरू भएको प्रभातफेरी लैनचौर, उत्तरढोका, बालुवाटार हुँदै पुनः केन्द्रीय कार्यालयमा आई समापन गरिएको कम्पनीले जनाएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।