राप्ती हाइड्रोको आईपीओमा १४ सय जनाको १७ हजार कित्ता सेयरकाे आवेदन रद्द

राप्ती हाइड्रो एण्ड जनरल कन्स्ट्रक्सन लिमिटेडले निष्काशन गरेको आईपीओमा १४ सय आवेदकको १७ हजार बढी कित्ता सेयर रद्द भएको छ ।

कम्पनीको धितोपत्र निष्काशन तथा बिक्री प्रबन्धक सिद्धार्थ क्यापिटलका अनुसार सोमबार भएको बाँडफाँडमा दोहोरो तेहोरो आवेदन दिने १ हजार ४२४ आवेदनबाट परेको १७ हजार ३७० कित्ता सेयरको माग रद्द भएको हो ।

कुल १४ लाख ९१ हजार ७२२ आवेदनबाट १ करोड ६२ लाख ७६ हजार ६१० कित्ता सेयरका लागि आवेदन परेको थियो । जसमध्ये १४ लाख ९० हजार २९८ आवेदनबाट प्राप्त १ करोड ६२ लाख ५९ हजार २४० कित्ता सेयरलाई बाँडफाँड प्रकृयामा सामेल गराइएको थियो । आवेदन दिएका मध्ये कुल १२ लाख ७४ हजर २८ जना आवेदक हात खाली भएका छन् । जसमध्ये १२ लाख ७२ हजार ६०४ सदर आवेदकले सेयर प्राप्त गर्न सकेनन् ।

धितोपत्र निष्काशन तथा बाँडफाँड निर्देशिका २०७४ बमोजिम २ लाख १७ हजार ६९४ जनालाई सेयर बाँडफाँड गरिएको छ । सबै आवेदकलाई १० कित्ताका खरले सेयर बाँडफाँड गर्न अपुग भएपछि गोलाप्रथाबाट २ लाख १७ हजार ६९४ जनालाई १० कित्ताका दरले २१ लाख ७६ हजार ९४० कित्ता सेयर बाँडफाँड गरिएको हो ।

कम्पनीको धितोपत्र निष्काशन तथा बिक्री प्रबन्धक सिद्धार्थ क्यापिटलको कार्यालय नक्सालमा साउन ९ गते सोमबार बिहान उक्त सेयर बाँडफाँड गरिएको थियो ।

कम्पनीले असार २९ गतेदेखि साउन १ गतेसम्म आयोजना प्रभावित क्षेत्रका बासिन्दाहरुबाट अवितरित ३७ हजार ६२३ कित्ता सहित कुल २३ लाख ६६ हजार २४० कित्ता सेयर जारी गरेको थियो । जसमध्ये ५ प्रतिशत अर्थात १ लाख १८ हजार ३१२ कित्ता सामूहिक लगानी कोषका इकाईका लागि र ३ प्रतिशत अर्थात ७० हजार ९८८ कित्ता कर्मचारीहरुका लागि सुरक्षित गरिएको थियो । २१ लाख ७६ हजार ९४० कित्ता सेयर सर्वसाधारणमा बाँडफाँड गरिएको हो ।

कम्पनीले रुकुममा ५ मेगावाटको रुकुम गाड हाइड्रोपावर आयोजना निर्माण गरिरहेको छ । कम्पनीको जारी पूँजी ६१ करोड २७ लाख ६६ हजार ८०० रुपैयाँ रहेको छ । जसमध्ये संस्थापक सेयरधनीबाट ३१ करोड ८६ लाख २५ हजार ८०० रुपैयाँ चुक्ता भैसकेको छ । २९ करोड ४१ लाख ४१ हजार रुपैयाँको आईपीओ बिक्रीपछि कम्पनीको चुक्ता पूँजी ६१ करोड २७ लाख ६६ हजार ८०० रुपैयाँ पुग्नेछ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।