शिखरको खुद नाफा ४० करोड माथि, ५०० करोड प्रिमियम संकलन

शिखर इन्स्योरेन्स कम्पनी लिमिटेडले गत आर्थिक वर्ष २०७८।७९ मा ४० करोड १४ लाख ३९ हजार रुपैयाँ खुद नाफा कमाएको अपरिष्कृत वित्तीय विवरण प्रकाशित गरेको छ ।

अघिल्लो आवको सोही अवधिमा ३१ करोड १३ लाख ६५ हजार रुपैयाँ नाफा कमाएको कम्पनीको खुद नाफा समीक्षा अवधिमा २८.९३ प्रतिशत बढेको हो ।

निर्जीवन बीमा क्षेत्रमा नम्बर वानको ताज बनाएको शिखरले इन्स्योरेन्सले २६.१० प्रतिशतले वृद्धि गर्दै ५ अर्ब ९२ लाख २२ हजार रुपैयाँ कुल बीमाशुल्क संकलन गरेको छ । यस अवधिमा कम्पनीको खुद बीमाशुल्क रकम पनि १८.५० प्रतिशत बढेर १ अर्ब ३९ करोड १० लाख रुपैयाँ पुगेको छ ।

गत आवमा गत आर्थिक वर्षको अन्त्यसम्ममा कम्पनीको चुक्ता पुँजी ३० प्रतिशत बढेर २ अर्ब २८ करोड ६० लाख ८१ हजार रुपैयाँ पुगेको छ । कम्पनीको जगेडा कोषमा ८७ करोड ७ लाख २२ हजार रुपैयाँ सञ्चित छ । अघिल्लो आवको तुलनामा जगेडा कोषको आकार ४४ प्रतिशत बढेको हो ।

चौथो त्रैमाससम्मको विवरण अनुसार इन्स्योरेन्सले पुनर्बीमा कमिशन आम्दानी २४.४२ प्रतिशत वृद्धि गर्दै ६७ करोड ४६ लाख ३२ हजार रुपैयाँ आम्दानी गरेको छ । यस्तै कम्पनीले १० करोड ६५ लाख १५ हजार रुपैयाँ लगानी, कर्जा तथा अन्यबाट आय गरेको छ । जुन अघिल्लो आवको तुलनामा १ करोड २० लाख कम हो । कम्पनीले गत आवमा ९७ करोड ५० लाख ५८ हजार रुपैयाँ खुद दाबी भुक्तानी गरेको छ ।

गत आवमा इन्स्योरेन्सको प्रतिसेयर आम्दानी १७.५६ रुपैयाँ छ । पुँजी वृद्धिभन्दा नाफा कम बढ्दा १५ पैसा इपिएस घटेको हो । असार मसान्तसम्ममा इन्स्योरेन्सको प्रतिसेयर नेटवर्थ २५४.४० रुपैयाँ, प्रतिसेयर कुल सम्पत्तिको मूल्य ३५६.५० रुपैयाँ र मूल्य आम्दानी अनुपात ४५.९६ गुणा छ ।

इन्स्योरेन्सको बीमा कोषमा १ अर्ब ४१ करोड १६ लाख २७ हजार रुपैयाँ र महाविपत्ती कोषमा ११ करोड ८ लाख १८ हजार रुपैयाँ रहेको छ । अघिल्लो आवको सोही अवधिको तुलनामा बीमा कोष १६.५८ प्रतिशत बढ्दा महाविपत्ती कोष यथावत छ ।

समीक्षा अवधिमा इन्स्योरेन्स कम्पनीले १८ हजार ८८४ वटा दाबी वापत २ अर्ब १६ करोड ६६ लाख रुपैयाँ भुक्तानी गरेको छ भने अब १५ हजार ९०० वटा दाबी वापत परेको २ अर्ब ४२ करोड ३६ लाख रुपैयाँ भुक्तानी गर्न बाँकी छ । अघिल्लो आवभन्दा कम्पनीको कम संख्या र रकममा दाबी भुक्तानी दिएका कारण दायित्व बढेको छ ।

अघिल्लो आवको सोही अवधिमा १९ हजार १९१ वटा दाबी वापत २ अर्ब २० करोड ३९ लाख भुक्तानी गर्दा १५ हजार ३१२ संख्याबाट परेको २ अर्ब १८ करोड ८७ लाख रुपैयाँ भुक्तानी गर्न बाँकी थियो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।