नेशनल लाइफको खुद बीमाशुल्क १८ प्रतिशत बढ्यो, जीवन बीमा कोष आधा खर्बमाथि

नेशनल लाइफ इन्स्योरेन्स कम्पनीले गत आर्थिक वर्षमा खुद बीमाशुल्क संकलन १७.८८ प्रतिशतले बढाउँदै गत आवको अन्त्यसम्ममा १४ अर्ब २८ करोड ३९ लाख ८४ हजार २७ रुपैयाँ पुर्‍याएको छ ।

खुद बीमा शुल्क १७.८८ प्रतिशतले वृद्धि भएपनि कम्पनीको खर्च बढ्दा खुद नाफा भने समीक्षा अवधीमा १.९२ प्रतिशत मात्र छ । कम्पनीले गत आवमा ४० करोड ८८ लाख ९३ हजार ८९५ रुपैयाँ खुद नाफा कमाएको हो ।

गत आवमा कम्पनीले पुनर्बीमा कमिसन वापत ४ करोड ६५ लाख ५१ ह्जार तथा लगानी कर्जा तथा अन्यबाट आय शीर्षकमा ३ अर्ब ६० करोड ७८ लाख ४४ हजार रुपैयाँ र ८ अर्ब १ करोड ३७ लाख रुपैयाँ बीमालेख धितोमा कर्जा प्रवाह गरी कम्पनीले ६३ करोड २२ लाख ८५ हजार रुपैयाँ आम्दानी गरेको छ ।

नेशनल लाइफ इन्स्योरेन्सको बीमा कोषमा ५१ अर्ब १५ करोड ५३ लाख ३३ हजार १०१ रुपैयाँ सञ्चित छ । अघिल्लो आवमा ४४ अर्ब ४२ करोड ४२ लाख रहेकोमा समीक्षा अवधीमा जीवन बीमा कोषको आकार २०.५८ प्रतिशतले वृद्धि भएको हो । नेशनल लाइफ जीवन बीमा कोषको आधारमा देशको तेस्रो ठूलो जीवन बीमा कम्पनी हो । यस्तै जगेडा कोष २४ प्रतिशतले घटेर ६६ करोड ७१ लख ७४ हजारमा संकुचित भएको छ ।

चुक्ता पुँजी ५ अर्ब ११ करोड ५५ लाख ३३ हजार रुपैयाँ रहेको नेशनल लाइफको वार्षिक प्रतिसेयर आम्दानी १०.१३ रुपैयाँ, प्रतिसेयर नेटवर्थ १२५.१९ रुपैयाँ, कम्पनीको प्रतिसेयर कूल सम्पत्तिको मूल्य १४९९.९८ रुपैयाँ छ ।

कम्पनीको खुद दाबी भुक्तानी ४६.५१ प्रतिशतले बढेर पाँच अर्ब ७९ करोड ६७ लाख ७२ हजार ५५४ रुपैयाँ पुगेको छ । कम्पनीको व्यवस्थापन खर्च १०.६६ प्रतिशतले बढेको छ । गत आवको अन्त्यसम्ममा एक अर्ब २५ करोड ४४ लाख खर्च गरेको छ । गत आवमा नेशनल लाइफले एक अर्ब ५२ करोड २२ लाख रुपैयाँ अभिकर्ता कमिशन बापत वितरण गरेको छ । जुन अघिल्लो आवको तुलनामा १४.१० प्रतिशत बढी हो ।

गत आवको अन्त्य सम्ममा कम्पनीमा हाल १५ लाख ९६ हजार ८३० बीमा पोलिसी संख्या रहेको छ । कम्पनीले गत आवमा पाँच अर्ब ९९ करोड ४८ लाख रुपैयाँ दाबी भुक्तानी गरेको छ भने ९६ करोड १७ लाख २६ हजार ७९३ रुपैयाँ दाबी भुक्तानी बक्यौता छ ।
गत आवमा कम्पनीले आफ्ना कर्मचारीहरुको लागि पाँच करोड ३२ हजार ९६ रुपैयाँ बोनस वितरण गरेको छ ।

समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।