एक अर्ब २० करोडको सामुहिक लगानी कोषको इकाई बिक्री खुला हुँदै

सानिमा क्यापिटल लिमिटेडले कात्तिक १६ गतेदेखि एक अर्ब २० करोडको ‘सानिमा ग्रोथ फन्ड’ को इकाई बिक्री खुला गर्ने भएको छ ।

सानिमा म्युचुअल फण्ड अन्तर्गत सञ्चालनमा आउने उक्त योजनाको कुल १२ करोड इकाई प्रतिइकाई १० रुपैयाँको दरले बिक्रीमा आउन लागेको हो ।  जसमध्ये सानिमा ग्रोथ फन्डको १२ करोडमध्ये १५ प्रतिशत अर्थात १ करोड ८० हजार इकाई बीज पुँजी वापत छुट्टाइएको छ ।

कुल १ करोड ५६ लाख इकाई वा कुल बिक्री भएको इकाईको १३ प्रतिशत विज पुँजीवापत कोष प्रवद्र्धक सानिमा बैंकलाई र २ प्रतिशत अर्थात् २४ लाख इकाई योजना व्यवस्थापक सानिमा क्यापिटललाई सुरक्षित गरिएको हो ।

कात्तिक १६ गतेदेखि निष्कासन हुुने फण्डको १० करोड २० लाख इकाई खरिदका लागि आम सर्वसाधारण लगानीकर्ताले आवेदन दिन पाउने योजना व्यवस्थापक सानिमा क्यापिटलले जनाएको छ ।

कात्तिक २० गतेसम्म इकाई बिक्री खुला रहनेछ भने उक्त समयमा सबै इकाई बिक्री नभएमा कात्तिक ३० गतेसम्म आवेदन समय लम्बिनेछ । लगानीकर्ताले न्यूनतम १०० इकाईदेखि अधिकतम १ करोड २० लाख इकाईसम्म आवेदन दिन सक्नेछन् ।

इकाई खरिदका लागि मेरो सेयरको मोबाइल एप, मेरो सेयर सफ्टवेयर तथा नेपाल धितोपत्र बोर्डबाट सी–आस्वा सदस्यता प्राप्त सम्पूर्ण बैंक तथा वित्तीय संस्थाहरुबाट आवेदन दिन सकिनेछ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।