सेयर लगानीकर्ताको मनोबल बलियो बन्दा नयाँ सरकारपछि नेप्से १८० अंकले बढ्यो

शेर बहादुर देउवा नेतृत्वको सरकार परिवर्तन भइ नेकपा माओबादी केन्द्रका अध्यक्ष पुष्पकमल दाहाल ‘प्रचण्ड’ को नेतृत्वमा सरकार बनेपछि नेप्से १७९.०८ अंकले बढेको छ ।

नयाँ सरकार गठनसँगै नेकपा एमालेका उपाध्यक्ष विष्णुप्रसाद पौडेल अर्थमन्त्रीको रुपमा रहेका छन् । पौडेलले कार्यभार सम्हालेको पाँच कारोबार दिनमध्ये चार दिन नेप्से बढेको छ भने एक दिन सामान्य अंकले घटेको छ । गत साता चार कारोबार दिनमध्ये बुधबार १२ अंकले घटेको नेप्से अन्य सबै दिनमा ५० अंक माथिको वृद्धि आएको थियो ।

साताो पहिलो कारोबार दिन आइतबार पनि नेप्से अधिकतम ५४ अंकसम्म बढेर सूचक २०८३ सम्म उक्लिएको थियो । तर निरन्तरको नेप्से परिसूचकमा आएका आकर्षक बढोत्तरीमा प्रोफिट बुकिङ्ग बढ्दा सूचक आइतबार बन्द हुँदा १७.२६ अङ्कले उकालो लागेर २०४६.२९अंकमा अडिएको छ ।

धितोपत्र बजारमा सेयर कारोबार मापक नेप्से परिसूचकमा दोहोरो अङ्कको वृद्धि भएसँगै कारोबार रकम समेत बढेर ४ अर्ब नाघेको छ । नेपाल स्टक एक्सचेञ्जका अनुसार आज कूल १ करोड ८ लाख ८० हजार ९०४ कित्ता सेयर ४ अर्ब ४ करोड ८८ लाख ७९ हजार ५१० मूल्यमा खरिद बिक्री भएका छन् । कूल कम्पनीमध्ये १२१ कम्पनीको सेयर मूल्यमा वृद्धि भएको छ । त्यस्तै ८७ कम्पनीको सेयर मूल्यमा गिरावट आउँदा ४ कम्पनीको सेयर मूल्यमा कुनै परिवर्तन भएन ।

नेप्सेका अनुसार ठूला कम्पनीको सेयर कारोबार मापन गर्ने सेन्सेटिभ परिसूचक२.७२ अङ्कले उकालो लागेर ३९४.०२ बिन्दुमा पुगेको छ । कारोबार भएका कूल १३ उपसमूहमध्ये २ उपसमूहगत सूचकमा गिरावट आउँदा ११ वटामा वृद्धि भएको छ । साताको पहिलो दिनको कारोबारपछि बजार पुँजीकरण २९ खर्ब ५९ अर्ब ४१ करोड ७५ लाख ४३ हजार २३२ रुपैयाँ बराबर रहेको छ ।

कारोबारका आधारमा नबिल बैंक शीर्ष स्थानमा छ । सो बैंकको २२ करोड ५७ लाख ४८ हजार ९७९ रुपैयाँ बराबरको कारोबार भयो । नेपाल दूरसञ्चार कम्पनी १९ करोड ८८ लाख १ हजार ३२१ रुपैयाँ, हिमालयन डिस्टिलरी १५ करोड ८० लाख ३१ हजार ४५७ रुपैयाँ, एनआइसी एशिया बैंकको १० करोड ३ लाख ८३ हजार ३८७ रुपैयाँ र नेपाल लाइफ इन्स्योरेन्सको ९ करोड २९ लाख ४८ हजार ७२५ रुपैयाँ बराबरको कारोबार भई शीर्ष पाँच भित्र पर्न सफल भएका छन् ।

नेप्सेका अनुसार आइतबार बजारमा श्रृजनशील लघुवित्त, खप्तड लघुवित्त, धौलागिरि लघुवित्तको सेयर मूल्यमा १० प्रतिशत बराबरको वृद्धि भई सकारात्मक सर्किट लाग्यो । यस्तै अजोड इन्स्योरेन्स ९.९८ र प्रभु लाइफ इन्स्योरेन्सका लगानीकर्ताले ९.९८ प्रतिशतले कमाएका छन् ।

यस्तै, सिद्धार्थ इक्विटी फन्डका इकाइधनीले सर्वाधिक ५.५७ प्रतिशत, नेपाल बैंकको ऋणपत्र ३.९२, एनआरएन इन्फ्रास्टकचर एण्ड डेभलपमेन्ट लिमिटेड ३.८४, मिथिला लघुवित्त ३.६९ र रिभर फल्स पावरका लगानीकर्ताले ३.६५ प्रतिशतले गुमाएका छन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।