शिखर इन्स्योरेन्सको ३८ करोड ५० लाख बराबरको लाभांश पारित

शिखर इन्स्योरेन्स कम्पनीको एकैपटक सम्पन्न भएको दुई आर्थिक वर्षको साधारण सभाबाट कुल ३८ करोड ५० लाख २४ हजार ८२ रुपैयाँ बराबरको लाभांश वितरण गर्ने प्रस्ताव पारित गरेको छ ।

बुधबार सम्पन्न भएको १७ औं तथा १८ औं वार्षिक साधारण सभाले चुक्ता पुँजीको १६ प्रतिशतले हुन आउने ३६ करोड ५७ लाख ७२ हजार ९९२ रुपैयाँ बराबरको बोनस सेयर र ०.८४ प्रतिशतले हुन आउने १ करोड ९२ लाख ५१ हजार ९० रुपैयाँ बराबरको नगद लाभांश वितरण गर्ने प्रस्ताव अनुमोदन गरेको हो । कम्पनी सञ्चालक समितिको मंसिर २९ गते सम्पन्न भएको २८७ औं बैठकले गत आवका नाफाबाट कुल १६.८४ प्रतिशत लाभांश वितरण गर्ने प्रस्ताव गरेको थियो ।

सभाबाट पारित १६ प्रतिशत बोनसपछि कम्पनीको चुक्ता पुँजी २ अर्ब ६५ करोड १८ लाख ५४ हजार रुपैयाँ नाघेको छ । जुन नेपाल बीमा प्राधिकरणले निर्जीवन बीमा कम्पनीले कायम गर्नुपर्ने न्यूनतम पुँजीभन्दा बढी हो । प्राधिकरणले निर्जीवन बीमा कम्पनीको न्युनतम पुँजी २ अर्ब ५० करोड रुपैयाँ तोकेको छ ।

यस्तै सभाले आगामी दिनमा कुनै कम्पनीसँग गाभ्ने तथा गाभिने तथा प्राप्तिमा जान उपयुक्त लागेमा सञ्चालक समितिलाई सम्पूर्ण अख्तियारी समेत दिएको छ । सभाले कम्पनीको स्वतन्त्र सञ्चालक इन्द्र प्रसाद कर्मचार्यको नियुक्तिलाई अनुमोदन गरेको छ । उनी गत माघ २३ गते बीमा ऐन २०७९ बमोजिम नियुक्त भएका थिए ।

सभाले वार्षिक प्रतिवेदन र लेखापरीक्षण प्रतिवेदन सहितको वित्तीय विवरणहरु उपर छलफल गरी सोलाई पारित गरेको छ । सभाले आर्थिक वर्ष २०७८।७९ को लेखापरीक्षकमा हालकै लेखापरीक्षक बिके अग्रवाल एण्ड कम्पनी चार्टर्ड एकाउन्टेन्टस्लाई कूल ४ लाख ५० हजार रुपैयाँ (मूल्य अभिवृद्धि कर बाहेक) पारिश्रमिकमा निरन्तरता दिएको छ ।

सभाले सर्वसाधारण सेयरधनीबाट प्रतिनिधित्व गर्ने एक जना सञ्चालक बढाएर ३ जना, संस्थापक सेयरधनीबाट ३ जना, र स्वतन्त्र सञ्चालकमा एक जना गरी ७ जना सञ्चालक नियुक्त हुने व्यवस्था गरेको छ । यसअघि संस्थापकबाट ४, सर्वसाधारणबाट २ जना र स्वतन्त्रबाट १ जना नियुक्त हुने व्यवस्था थियो ।

सभाले सञ्चालक समिति सदस्यको भत्ता वृद्धि गरेको छ । अब अध्यक्षले बैठक भत्ता वापत प्रतिबैठक २० हजार रुपैयाँ, सदस्यलाई १८ हजार र अन्य समितिको प्रतिबैठक भत्ता वापत संयोजक तथा सदस्यलाई ९ हजार रुपैयाँ भत्ता पाउनेछन् । यसअघि अध्यक्षले प्रतिबैठक १२ हजार, सदस्यले १० हजार र उपसमितिका संयोजक तथा सदस्यलाई ५ हजार रुपैयाँ पाउँदै आएका थिए ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।