पिपुल्स पावरको हकप्रदमा आवेदन दिने म्याद थप

काठमाडौँ । पिपुल्स पावरको हकप्रद शेयरमा आवेदन दिने म्याद थप गरिएको छ।

कम्पनीले गत असार २२ गतेदेखि शेयरधनीहरुका लागि हकप्रद शेयर जारी गरेको थियो। यो हकप्रदमा आज आइतबार बैंकिङ समयसम्म आवेदन दिन सकिने व्यवस्था गरिएको थियो। शेयरधनीको मागलाई ध्यानमा राखी आवेदन दिने म्याद साउन २६ गते बैंकिङसम्म थप गरिएको धितोपत्र बिक्री प्रबन्धक प्रभु क्यापिटलले जनाएको छ।

कम्पनीले हाल कायम चुक्तापुँजी ६३ करोड २६ लाख रुपैयाँको १ः०.५ अनुपातमा अर्थात ५० प्रतिशतले हुन आउने ३१ करोड ६३ लाख रुपैयाँबराबरको हकप्रद शेयर बिक्री खुला गरेको छ। जसअनुसार कम्पनीले १०० रुपैयाँ अंकित दरका कुल ३१ लाख ६३ हजार कित्ता हकप्रद शेयर जारी गरेको छ।

लगानीकर्ताले नेपाल धितोपत्र बोर्डबाट इजाजत प्राप्त सी–आस्बा सेवामा सहभागी बैंक तथा वित्तीय संस्था र सीडीएससीको ‘मेरो शेयर’मार्फत पनि आवेदन दिन सक्नेछन्। लगानीकर्ताले धितोपत्र बिक्री प्रबन्धक प्रभु क्यापिटलका साथै प्रभु बैंकका शाखा इलाम, जावलाखेल, वीरगन्ज, पोखरा, बुटवल, सुर्खेत र धनगढीबाट आवेदन दिन सक्नेछन्।