२० निर्माण कम्पनी कालोसूचीमा, १ देखि ३ वर्षसम्म काम गर्न नपाउने

काठमाडौँ । सार्वजनिक खरिद अनुगमन कार्यालयले २० वटा निर्माण व्यवसायी तथा आपूर्तिकर्तालाई कालोसूचीमा राखेको छ । सार्वजनिक खरिद प्रक्रियामा लापरबाही र सम्झौता उल्लङ्घन गर्ने निर्माण व्यवसायी तथा आपूर्तिकर्ता कालोसूचीमा परेका हुन् ।

प्रधानमन्त्री तथा मन्त्रिपरिषद्को कार्यालयअन्तर्गतको उक्त कार्यालयले विभिन्न सार्वजनिक निकायको सिफारिसका आधारमा सार्वजनिक खरिद ऐन, २०६३ को दफा ६३ बमोजिम उनीहरूलाई कालोसूचीमा राख्ने निर्णय गरेको हो ।

कार्यालयले १८ निर्माण कम्पनीलाई एक वर्षका लागि कालोसूचीमा राखेको छ भने अन्य २ कम्पनीलाई तीन वर्षका लागि कालोसूचीमा राखिएको छ । कालोसूचीमा परेका निर्माण व्यवसायी तथा आपूर्तिकर्ताले तोकिएको अवधिभर कुनै पनि सार्वजनिक निकायको खरिद प्रक्रियामा भाग लिन पाउने छैनन् ।