डोंगफेङद्वारा युरोपमा डिजाइन केन्द्र स्थापना

काठमाडौँ । डोंगफेङ मोटरले युरोपेली बजार विस्तार गर्ने लक्ष्यसहित जर्मनीको म्युनिखमा नयाँ डिजाइन केन्द्र स्थापना गरेको छ। उक्त केन्द्रले कम्पनीको विश्वव्यापी अनुसन्धान तथा विकास सञ्जाललाई मजबुत बनाउँदै युरोपेली ग्राहकहरूको रुचिअनुसारका सवारी डिजाइन विकास गर्नेछ।

जनवरी २९ मा उद्घाटन गरिएको यो केन्द्रले एम–हिरो र भ्वायाह ब्रान्डका परियोजनामा विशेष ध्यान दिने कम्पनीले जनाएको छ। म्युनिखलाई अटोमोबाइल डिजाइन तथा इन्जिनियरिङको प्रमुख केन्द्रका रूपमा मानिने भएकाले रणनीतिक रूपमा उक्त स्थान छनोट गरिएको हो।

कम्पनीका अनुसार नयाँ केन्द्रले आधुनिक प्रविधिको प्रयोगमार्फत डिजाइन तथा विकास प्रक्रियालाई तीव्र बनाउनेछ भने विश्वव्यापी बजार रणनीतिमा समेत सहयोग पुर्‍याउनेछ। यस कदमसँगै डोंगफेङले युरोपमा आफ्नो उपस्थिति थप सुदृढ बनाउने लक्ष्य लिएको छ।