राजस्व कार्यालय मकवानपुरले लक्ष्यअनुसार राजस्व उठाउन सकेन

आन्तरिक राजस्व कार्यालय मकवानपुर हेटौँडाले आर्थिक वर्ष २०७६/७७ मा रु चार अर्ब ६८ करोड ७२ लाख राजस्व सङ्कलन गरेको छ ।

यो लक्ष्यको तुलनामा १९ दशमलव ४६ प्रतिशतले कम हो । कार्यालयले सो आर्थिक वर्षमा रु पाँच अर्ब ८२ करोड राजस्व सङ्कलन गर्ने लक्ष्य लिएको थियो ।

विश्वव्यापीरुपमा फैलिएको कोरोना भाइरस सङ्क्रमण रोकथाम तथा नियन्त्रणका लागि सरकारले मुलुकमा घोषणा गरिएको लकडाउनका कारण लक्ष्यको तुलनामा कम राजस्व सङ्कलन भएको कार्यालयले जनाएको छ ।

आर्थिक वर्ष २०७४/७५ को तुलनामा गत आर्थिक वर्षमा करिब १० प्रतिशत बढी राजस्व सङ्कलन भएको हो । आर्थिक वर्ष २०७४/७५ मा चार अर्ब २२ करोड ४३ लाख राजस्व सङ्कलन भएको थियो ।

कार्यालयका सूचना अधिकारी हरेराम ढकालले गत आर्थिक वर्षमा सङ्कलित रकममध्ये अन्तःशुल्क करतर्फ २  अर्ब ५२ करोड १६ लाख, मूल्य अभिवृद्धि करतर्फ १ अर्ब २ करोड १५ लाख र आयकरतर्फ ८९ करोड ६० लाख राजस्व सङ्कलन भएको जानकारी दिए।

कार्यालयले वार्षिक राजस्व सङ्कलन गर्ने लक्ष्यअनुसार घर बहाल कर सम्बन्धमा प्रदेश सरकारको नयाँ नियामवलीले स्थानीय निकायले आफ्नो नगरको घर बहालकर आफैँ उठाउने निर्णयले आन्तरिक राजस्व कार्यालयको मातहतमा सो राजस्व यस वर्षदेखि नआएको बताइएको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।