नजिकिँदो मसान्त र दशैंले शेयर बजारमा दोहोरो अंकको गिरावट

नजिकिँदो असोज मसान्त र संनिकट बनेको नेपालीहरुको महान चाड दशैंका लागि शेयर लगानीकर्ताहरुले रकम बजारबाट निकाल्दा शेयर बजारमा साताको पहिलो कारोबार दिन आइतबार नै नेप्से परिसूचक दोहोरो अंकले घटेको छ ।

कर तथा बैंक तथा वित्तीय संस्थाबाट कर्जा लिएर शेयरमा लगानी गरेका लगानीकर्ताहरुले पैसाको जोहो गर्दा बजारमा दोहोरो अंकको गिरावट देखिएको हो । मसान्त नजिकिएसँगै सरकारलाई कर र ऋण लिएकाहरुलाई ब्याज तिर्ने हतारो रहने गर्दछ । जसका कारण लाभांश सिजन र बैंक तथा वित्तीय संस्थाहरुमा अधिक तरलताका बीच पनि शेयर बजारमा दोहोरो अंकका. गिरावट आएको हो ।

आज नेप्से परिसूचक १३.३७ अंकले घटेर १ हजार ५७६ दशमलव २७ बिन्दुमा झरेको छ। ठूला कम्पनीहरुको सूचक मापक सेन्सेटिभ इण्डेक्स पनि ३.०१ अंकले घटेर ३११.७३ बिन्दुमा बन्द भएको छ ।

आजको बजारमा १९३ कम्पनीको ९२ लाख ८१ हजार ४७८ कित्ता शेयर ३७ हजार ५१५ पटक खरिद बिक्री हुँदा कारोबार रकम २ अर्ब ३९ करोड ५४ लाख ३२ हजार रुपैयाँ पुगेको छ । गत बिहीबारको तुलनामा आइतबार कारोबार रकम भने ५० लाख ९६ हजार रुपैयाँले घटेको हो ।

• वित्त बाहेक सबै उपसमूहका सूचक घटे

कारोबारमा आएका १२ उपसमूहमध्ये वित्तको परिसूचक बाहेक अरु सबै उपसमूहको परिसूचक घटेका छन् । वित्तको परिसूचक २.०८ प्रतिशत बढेको छ भने होटल उपसमूहको परिसूचक सबैभन्दा धेरै २.१४ प्रतिशतले घटेको छ ।

जलविद्युत १.९८ प्रतिशत, ब्यापार १.८४ प्रतिशत, उत्पादन १.५५, निर्जीबन बीमा १.०९ र विकास बैंक १.०१ प्रतिशतले घटेको छ । बैंकिङ्ग, अन्य लघुवित्त, जीबन बीमा, र म्युचुअल फण्डको सूचक १ प्रतिशतभन्दा कमले घटेको छ ।

• नेपाल लाइफ इन्स्योरेन्सको उच्च कारोबार

नेपाल लाइफ इन्स्योरेन्स आइतबार कारोबार रकमका आधारमा अग्र स्थानमा रहेको छ । कम्पनीको १० करोड ६ लाख रुपैयाँ बराबरको शेयर कारोबार भएको छ ।

यसैगरी अपि पावर कम्पनीको १० करोड २ लाख, अरुण भ्याली हाइड्रोपावरको ९ करोड ६९ लाख, सानिमा माइ हाइड्रोपावरको ७ करोड ६४ लाख, अरुण काबेली पावरको ७ करोड ४२ लाख, हिमाल दोलखा हाइड्रोपावरको ७ करोड ८ लाख, कामना सेवा विकास बैंकको ६ करोड ७४ लाख, नेशनल हाइड्रोपावरको ५ करोड ९६ लाख, नेपाल रि इन्स्योरेन्सको ५ करोड ७९ लाख र कुमारी बैंकको ५ करोड ६५ लाख रुपैयाँको शेयर कारोबार भयो ।

• आईसीएफसी फाइनान्सको शेयरमूल्यमा सकारात्मक सर्किट

आजको ऋणात्मक बजारमा पनि आईसीएफसी फाइनान्सको शेयरमूल्यमा सकारात्मक सर्किट लागेको छ । फाइनान्सको शेयर प्रतिकित्ता २२ रुपैयाँ अर्थात ९.८२ प्रतिशतले बढेर २४६ रुपैयाँ पुगेको छ ।

यसैगरी रिडी हाइड्रोपावर, जानकी फाइनान्स, श्री इन्भेष्ट एण्ड फाइनान्स, रिलायन्स फाइनान्स र सबैको लघुवित्तको शेयरमूल्य पनि ५ प्रतिशत धेरैले बढेको छ । गुडविल फाइनान्स, बेष्ट फाइनान्स, मञ्जुश्री फाइनान्स र आरएसडिसी लघुवित्त शेयरमूल्य बढ्ने दश कम्पनीमा समेटिएका छन् ।

• अपि पावर कम्पनीको शेयरमूल्य धेरै घट्यो

आज अपि पावर कम्पनीको शेयरमूल्य सबैभन्दा धेरै ७.१४ प्रतिशतले घटेको छ । फाइनान्सको शेयर प्रतिकित्ता १६ रुपैयाँले घटेर २०८ मा झरेको छ ।
यसैगरी खानीखोला हाइड्रोपावर, दिव्यश्वरी हाइड्रोपावर, पञ्चकन्या माइ हाइड्रोपावर, नेपाल फाइनान्स, आँखुखोला हाइड्रोपावर, युनियन हाइड्रोपावर, अरुण भ्याली हाइड्रोपावरको शेयरमूल्य ५ प्रतिशतभन्दा धेरैले घटेको छ ।

आजको बजारमा माउन्टेन हाइड्रोपावर र हिमाल दोलखा हाइड्रोपावरको शेयरधनीले पनि करिब ५ प्रतिशतका दरले नै गुमाएका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।