सोमबार लगानीकर्ता विकास बैंकतर्फ मोडिए, मुक्तिनाथ विकास बैंकको सर्किट मूल्यमा उच्च कारोबार

शेयर बजारका लगानीकर्ताहरु विकास बैंकतर्फ मोडिएका छन् ।आइतबार वित्त कम्पनीको शेयरमा लागेका शेयर खेलाडीहरु सोमबार विकास बैंकको शेयरतर्फ मोडिएका हुन् ।

यसअघि केही दिन पहिले जलविद्युत कम्पनीहरुको शेयरमा लगानी बढाएका कारोबारी लगानीकर्ताहरु आइतबारु वित्त कम्पनीहरुको शेयरतर्फ मोडिएका थिए । सोमबार भने विकास बैंकको शेयरमूल्य उच्च रुपमा बढेको छ । आजको बजारमा विकास बैंकको सूचक ३.८८ प्रतिशतले बढेको छ ।

नजिकिँदो दशैं र मसान्तका कारण कर र ब्याजको जोहोमा लाग्दा शेयर कारोबार रकम भने सोमबार पनि घटेको छ । आज १८९ कम्पनीका ६८ लाख १५ हजार ७१० कित्ता शेयर ३१ हजार ८३७ पटक खरीद बिक्री हुँदा कारोबार रकम १ अर्ब ९४ करोड ९० लाख रुपैयाँ पुगेको छ । यो रकम आइतबारको तुलनामा करिब ४५ करोड रुपैयाँ कम हो ।आइतबार २ अर्ब ३९ करोड ५४ लाखको शेयर खरीद बिक्री भएको थियो।

पछिल्लो समय शेयर कारोबारीहरु एकपछि अर्को समूहमा प्रवेश गर्ने र मूल्य बढाएर शेयर बिक्री गरी नाफा सुरक्षित गरेर बाहिरिने क्रम बढेको छ । यसले उक्त उप समूहमा उछाल आउने आशमा शेयर खरीद गर्ने नयाँ लगानीकर्ता भने फस्ने सम्भावना उच्च बनेको छ । केही दिन अघि हकप्रद र सस्तो शेयरमूल्य पम्प गरेका टाठा खेलाडीहरु अहिले ठूलो भ्योलुममा शेयर बिक्री गरी अर्को समूहको शेयर खरीद गर्नेतर्फ लागेका छन् । यसले दोस्रो बजारमा अभ्यस्त नभएका नयाँ लगानीकर्ता फस्ने सम्भावना उच्च रहेको लगानीकर्ताहरु बताउँछन् ।

नेप्से परिसूचक १.७४ अंकले बढेर १२ हजार ५७८.०१ बिन्दुमा बन्द हुँदा ठूला कम्पनीहरुको कारोबार मापक सेन्सेटिभ इन्डेक्स पनि १.३७ अंकले बढेर ३१३.१० अंकमा पुगेको छ ।

कारोबारमा आएका विकास बैंक सहित पाँच उपसमूहको सूचक बढ्दा ८ सूचक घट्न पुगेका छन् । आज वित्त सबैभन्दा धेरै १.३५ प्रतिशतले घट्दा विकास बैंकको सूचक ३.८८ प्रतिशतले बढोत्तरी भएका छन्। बाँकीमा १ प्रतिशतभन्दा कमको वृद्धि। गिरावट देखापर्र्यो ।

• मुक्तिनाथ विकास बैंकको सर्किटमा उच्च कारोबार

आजको बजारमा लगानीकर्ताहरुले विकास बैंकको शेयरमा लगानी बढाएपछि विकास बैंकमध्ये सबैभन्दा ठूलो र धेरै नाफा आर्जन गर्ने मुक्तिनाथ विकास बैंकको शेयरमूल्यमा सकारात्मक सर्किट लागेको छ । 

बैंकको प्रतिशेयर ३३ रुपैयाँ अर्थाथ ९.८५ प्रतिशतले बढेर ३३६८ रुपैयाँमा कारोबार बन्द भएको छ । बैंकको आज मात्रै ४ लाख ६० हजार ४७८ कित्ता शेयर १६ करोड ५० लाख रुपैयाँमा कारोबार भएको छ ।

यसैगरी अरुण भ्याली हाइड्रोपावरको ७ करोड ७१ लाख, कामना सेवा विकास बैंक ६ करोड ८८ लाख, नेपाल रि इन्स्योरेन्सको ५ करोड ३७ लाख, एनआईसी एशिया बैंकको ५ करोड ८ लाख रुपैयाँको शेयर कारोबार भएको छ ।

आजको बजारमा नेशनल हाइड्रोपावर, अपि पावर, कुमारी बैंक, नेपाल बैंक र ज्योति विकास बैंक शीर्ष कारोबार हुने दश कम्पनीभित्र समेटिएका छन् ।

• विकास बैंकमा आकर्षण

आजको बजारमा अधिकांश विकास बैंकहरुको शेयरमूल्य बढेको छ । शीर्ष शेयरमूल्य बढेका दश कम्पनीम आठवटा विकास बैंक रहेका छन् ।
मुक्तिनाथ विकास बैंकको शेयरमूल्य ९.८५ प्रतिशतले बढेको बजारमा कर्पोरेट डेभलपमेन्ट बैंक ५ , आईसीएफसी फाइनान्स ४.८८, कामना सेवा विकास बैंकको ४.५७ प्रतिशतले बढेको छ ।

तिनाउ डेभलपमेन्ट बैंक, मञ्जुश्री फाइनान्स, मितेरी डेभलपमेन्ट बैंक, कर्णाली विकास बैंक, ज्योति विकास बैंक र गरिमा विकास बैंकको पनि शेयरमूल्य बढेको छ ।

• सबैको लघुवित्तको शेयरमूल्य सबैभन्दा धेरै घट्यो

आजको बजारमा सबैको लघुवित्तको शेयरमूल्य सबैभन्दा घटेको छ । लघुवित्तको शेयर ६.०५ प्रतिशत अर्थात ५५ रुपैयाँले घटेर ८५४ रुपैयाँमा झरेको छ ।

रिडी हाइड्रोपावर र सेन्ट्रल फाइनान्सको शेयरमूल्य ५ प्रतिशतले घट्दा गुहेश्वरी मर्चेन्ट, मल्टिपर्पस फाइनान्स, साञ्जेन जलविद्युत, बेष्ट फाइनान्स, र श्री इन्भेष्ट फाइनान्सको शेयरमूल्य ४ प्रतिशत धेरैले घटेको छ । जानकी फाइनान्स र समृद्धि फाइनान्स पनिआजको बजारमा शीर्ष गुमाउने दश कम्पनीको सूचीमा अटाएका छन् ।