शेयर बजारमा दैनिक कारोबार रकम घट्न थाल्यो, नेप्सेमा सामान्य गिरावट

शेयर बजारमा दैनिक कारोबार रकम घट्न थालेको छ । साताको पहिलो कारोबार दिन आइतबार २ अर्ब ९३ करोडको शेयर कारोबार भएको बजारमा बुधबार कारोबार रकम १ अर्ब १८ करोड रुपैयाँ घटेर १ अर्ब ७५ करोड रुपैयाँमा झरेको छ ।

यसबीचमा सोमबार २ अर्ब ४५ करोड र मंगलबार २ अर्ब २३ करोडको शेयर कारोबार भएको थियो। मंगलबारको तुलनामा मात्रै कारोबार रकम ४८ करोडले घटेको हो ।

गत बिहीबारदेखि घट्दो क्रममा रहेको नेप्से मंगलबार सामान्य अंकले सकारात्मक रहेपनि बुधबार पुन दबाबमा परेको छ । आज नेप्से २.३९ अंकले घटेर १ हजार ६४० दशमलव ६४ अंकमा बजार बन्द भएको छ ।

आजको बजारमा ५० करोडभन्दा धेरै पूँजी भएका ठूला कम्पनीहरुको कारोबार मापन गर्ने सूचक सेन्सिटिभ इन्डेक्स पनि ०.११ अंकले घटेर ३२६ दशमलव ४९ अंकमा झरेको छ ।

मंगलबारको बजारमा २ कम्पनीको शेयरमूल्य ९ प्रतिशतभन्दा धेरैले बढेको छ भने कारोबारमा आएका १२ उपसमूहको परिसूचकमध्ये ब्यापार सहित पाँच उपसमूहको परिसूचक बढेका छन् भने ७ वटा घटेका छन् । निर्जीबन बीमा १.०७ प्रतिशतले घट्दा ब्यापार २.०७ प्रतिशतले बढेको छ ।

बुधबार २०२ कम्पनीको ५६ लाख ३१ हजार ६०४ कित्ता शेयर २४ हजार ८२ पटक खरीद बिक्री हुँदा कारोबार रकम १ अर्ब ७५ करोड ७४ लाख ५९ हजार रुपैयाँ पुगेको छ ।

• प्राइम बैंकको उच्च कारोबार

आज प्राइम कमर्सियल बैंकको सर्वाधिक कारोबार भएको छ । कम्पनीको ९ करोड ५ लाख रुपैयाँ बराबरको कारोबार भएको हो । यसैगरी अरुण काबेली पावरको ८ करोड २४ लाख, नेपाल दुरसञ्चार कम्पनी लिमिटेडको ७ करोड ५७ लाख, र अपि पावरको ५ करोड ११ लाख रुपैयाँको कारोबार भएको छ ।

एनआईसी एशिया बैंक, शिवश्री हाइड्रोपावर, नेपाल रि इन्स्योरेन्स कम्पनी, र सूर्या लाइफको संस्थापक शेयर शीर्ष कारोबार हुने दश कम्पनीमा समेटिएका छन् । दशौं ठूलो कारोबार भएको सूर्या लाइफको संस्थापक शेयरको ३ करोड ३४ लाखको कारोबार भएको छ ।

त्यस्तै कारोबार संख्याका आधारमा जनरल इन्स्यनेरेन्सको सर्वाधिक १ हजार १८९ कारोबार भएको छ । शेयर संख्याका आधारमा भने अरुण काबेली पावरको ३ लाख ६ हजार ७०३ कित्ता शेयर खरिद बिक्री भएको छ ।

• दुई कम्पनीको शेयर मूल्य ९ प्रतिशत धेरै बढ्यो

बुधबारको बजारमा २ कम्पनीको शेयर मूल्य ९ प्रतिशत भन्दा धेरैले बढेको छ । विशाल बजार कम्पनी र आजैबाट दोस्रो बजारमा कारोबार सुरु भएको सानिमा जनरल इन्स्योरेन्सको शेयरमूल्यमा सकारात्मक सर्किट लागेको छ ।

आजको बजारमा कालिका पावर, पाँचथर पावर, नेपाल ल्यूब आयल, सारथी नेपाल लघुवित्त, आँखुखोला हाइड्रोपावर, अपि पावर, युनियन हाइड्रोपावर, र एनआईसी एशिया ग्राथ फण्डको इकाइमूल्य शीर्ष शेयरमूल्य बढ्ने दश कम्पनीभित्र समेटिएका छन् ।

• शिवश्री हाइड्रोपावरका लगानीकर्ताले सर्वाधिक गुमाए

उता आजको बजारमा शिवश्री हाइड्रोपावरको शेयरमा लगानी गरेका लगानीकर्ताले सर्वाधिक ५.१७ प्रतिशतले गुमाएका छन् । मंगलबार ९ प्रतिशत धेरैले मूल्य बढेको राष्ट्रिय बीमा कम्पनीको संस्थापकको शेयरमूल्य ४.१९ प्रतिशतले घटेको छ ।

यसैगरी कामना सेवा विकास बैंक, समीट माइक्रोफाइनान्स, राष्ट्रिय बीमा कम्पनी, नेपाल फाइनान्स, माउन्टेन हाइड्रोपावर, एनआईसी एशिया डिबेञ्चर, गुराँस लघुवित्त, र नेपाल इन्भेष्ट बैंकको संस्थापक शेयरको मूल्य घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।