नेप्से सूचक ५४ महिना यताकै उच्च बिन्दुमा, एकैदिन ४ अर्ब बढीको शेयर कारोबार

शेयर बजार परिसूचक मापक नेप्से कार्तिक २५ गते मंगलबार ५४ महिना यताकै उच्च बिन्दुमा पुगेको छ । यअघि २०७४ बैशाख ११ गते सोमबार नेप्से परिसूचक १ हजार ६७५ दशमलव ७८ बिन्दुमा रहेकोमा त्यस यता भने सो बिन्दुभन्दा कम अंकमा रहेको थियो ।

त्यसपश्चात निरन्तर घटेको बजार २०७५ फागुन १४ गते मंगलबार १ हजार १०२ को बिन्दुमा रहेको थियो । सो बिन्दु पश्चात केही समयपछि बढ्न थालेको बजार २०७६ फागुन महिनामा १६२० दशमलव २७ अंकमा पुगेर पुनः घटेको थियो । कोरोना महामारीका कारण घट्न थालेको बजार अन्ततः साढे ४ वर्ष यताकै उच्च बिन्दुमा पुगेको हो ।

मंगलबार नेप्से परिसूचक २५.९८ अंकले बढेर १ हजार ६७८ दशमलव ७९९ अंकमा पुगेको छ । यसदिन १९६ कम्पनीका ४ अर्ब ९ करोड ६१ लाख ९० हजार २५६ रुपैयाँको शेयर खरीद बिक्री भएका छ । ९६ लाख ५७ हजार ६७७ कित्ता शेयर ३८ हजार ६३४ वटा कारोबारबाट उक्त संख्यामा कारोबार भएको हो ।

कारोबारमा आएका १२ उपसमूहको सूचकमध्ये जलविद्युत र म्युचुअल फण्ड बाहेक बाँकी दश उपसमूहको सूचक बढेका छन् । ब्यापारमा सबैभन्दा धेरै ७.८७ प्रतिशतले बढ्दा होटल ४.९१ प्रतिशत, जीबन बीमा ४.८७, अन्य ४.२० प्रतिशत, निर्जीबन बीमा १.९४ प्रतिशत, र उत्पादमूलक १.२४ प्रतिशतले बढेको छ ।

• नेपाल पुनर्बीमा कम्पनीको उच्च कारोबार

मंगलबार पनि नेपाल पुनर्बीमा कम्पनीको उच्च कारोबार भएको छ । कम्पनीको २८ करोड ५३ लाख ३२ हजार रुपैयाँमा खरीद बिक्री भएका छन् ।

यसैगरी नेपाल लाइफ इन्स्योरेन्सको २३ करोड ३८ लाख, हिमालयन डिष्टिलरीको २० करोड ८३ लाख, नेपाल दूरसञ्चार कम्पनीको २० करोड ६४ लाख रुपैयाँ बढीको कारोबार भएको छ ।

यसैगरी कामना सेवा विकास बैंकको १६ करोड ६७ लाख, नेशनल लाइफको १६ करोड ७१ लाख, सूर्या लाइफको १० करोड ५१ लाख र प्राइम लाइफको १० करोड २७ लाख रुपैयाँको शेयरको कारोबार भएको छ । अपि पावर र शिवस् सिमेन्टको पनि उच्च कारोबार भएको छ ।

• चार कम्पनीको शेयरमूल्यमा सर्किट

मंगलबारको बुलिस बजारमा ४ कम्पनीको शेयरमूल्यमा सकारात्मक सर्किट लागेको छ । सानिमा जनरल इन्स्योरेन्सको पाँचौं कारोबार दिन सर्किट लागेको छ भने कर्पोरेट डेभलपमेन्ट बैंक र साल्ट ट्रेडिङ्ग, र नेपाल टेलिकमको शेयरमूल्य पनि करिब १० प्रतिशतले बढेको छ ।

आजको बजारमा ओरियन्टल होटलको ६.७९ प्रतिशत र हिमालयन जनरल इन्स्योरेन्सको शेयरमूल्य ६.२९ प्रतिशतले बढ्दा तारागाउँ रिजेन्सी होटल, नेशनल लाइफ, नेपाल लाइफ र एशियन लाइफको शेयरमूल्य ५ प्रतिशत धेरैले बढेको छ ।

• बिशाल बजारको शेयरमूल्य उच्च घट्यो

आज बिशाल बजार कम्पनीको शेयरमूल्य उच्च घटेको छ । कम्पनीको शेयरमूल्य ४.६१ प्रतिशत अर्थात ११० रुपैयाँले घटेर २ हजार २७५ रुपैयाँमा झरेको छ ।

यसैगरी अरुण भ्याली हाइड्रोपावर, विजय लघुवित्त, आँखुखोला जलविद्युत, सांग्रिला डेभलपमेन्ट बैंक र प्रोगेशिभ फाइनान्सको शेयरमूल्य २ प्रतिशत धेरैले घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।