नेप्सेमा ३९ अंकको करेक्शन, जलविद्युत बाहेक सबै उपसमूहका सूचकमा रातो पोतियो

शेयर बजार परिसूचक मापक नेप्सेमा बुधबार ३९.६० अंकले घटेर १ हजार ९५५ दशमलव ७५ अंकमा बन्द भएको छ । कारोबारमा आएका जलविद्युत बाहेक बाँकी एघार वटै उपसमुहका सूचक ओरालो लागेपछि नेप्सेमा उच्च अंकको गिरावट आएको हो ।

नेप्सेमा आएको गिरावटसँगै पछिल्ला दिनहरुमा कारोबार रकम पनि घट्दो क्रममा देखिएको छ । समग्रमा शेयर बजार सुस्त बन्दै गइरहेको छ । बुधबार कारोबार रकम ४ अर्ब ७४ करोड ५६ लाख ४९ हजार २९२ रुपैयाँमा खुम्चिएको छ । आज २०१ कम्पनीका १ करोड ८ लाख २१ हजार ९७२ कित्ता शेयर ४६ हजार ४७५ पटक खरीद बिक्री भएका छन् । मंगलबार ५ अर्ब ७१ करोड ९४ लाख, सोमबार ६ अर्ब ६६ करोड ७९ लाख र आइतबार ७ अर्ब २० करोड ९१ लाख रुपैयाँ बढीको शेयर करोबार भएको थियो ।

आज ब्यापार उपसमूहको सूचक ४.८७ प्रतिशतले घट्दा बैंकिङ्ग, होटल, निर्जीबन बीमा, लघुवित्त, जीबन बीमा, उत्पादन तथा प्रशोधन, अन्यको सूचक २ प्रतिशत बढीले घटेको छ । म्युचुअल फण्ड, विकास बैंक र वित्तको सूचक पनि आरालो लागेका छन् । जलविद्युतको सूचक भने १.२५ प्रतिशतले बढेको छ ।

• पुनर्बीमा कम्पनीको उच्च कारोबार

आजको बजारमा पुनर्बीमा कम्पनीको उच्च कारोबार भएको छ । कम्पनीको ४२ करोड ४२ लाख ७२ हजारको शेयर कारोबार भएकोमा शेयरमूल्य भने ६५ रुपैयाँले घटेर १५४० रुपैयाँमा झरेको छ ।

यस्तै दोस्रो ठूलो कारोबार भएको अपर तामाकोशीको २५ करोड ९४ लाख, अरुण काबेली २३ करोड २१ लाख र नेपाल लाइफको २० करोड २६ ालखको शेयर कारोबार भयो । रसुवागढी हाइड्रोपावर, नेपाल बैंक, एनटिसी, शिवम् सिमेन्टस्, आईएमई जनरल इन्स्योरेन्स, र नागरिक लगानी कोष शीर्ष कारोबार हुने दश कम्पनीभित्र परेका छन् ।

• नारायणी र साञ्जेनमा सकारात्मक सर्किट

आजको बजारमा नारायणी डेभलपमेन्ट बैंक र साञ्जेन जलविद्युत कम्पनीकोृ शेयरमूल्यमा सकारात्मक सर्किट लागेको छ । दुबै कम्पनीको शेयरमूल्य करिब दश प्रतिशतले बढेको हो ।

यसैगरी रसुवागढी हाइड्रोपावर, प्रभु बैंक संस्थापक, नेपाल ल्यूब आयल, अपर तामाकोशी, राधी विद्युत कम्पनी, युनिलिभर नेपाल लिमिटेड, लिवर्टी इनर्जी र माउन्टेन हाइड्रो नेपाल लिमिटेड आजको बजारमा शेयरमूल्य बढ्ने दश कम्पनीभित्र समेटिएका छन् ।

• अरुण भ्याली र हिमालयन उर्जाको मूल्यमा उच्च गिरावट

आजको बजारमा अरुण भ्याली र हिमालयन उर्जाको मूल्यमा उच्च गिरावट आएको छ । दुबैको शेयरमूल्य ५ प्रतिशत बढीले घटेको छ ।

यसैगरी साल्ट्र ट्रेडिङ्ग कर्पोरेशन, कालिका पावर, बिशाल बजार कम्पनी, सूर्योदय लघुवित्त, मिथिला लघुवित्त, प्रभु बैंक, पुनर्बीमा कम्पनी र शिवम् शिमेन्टसको शेयरमा लगानी गरेका लगानीकर्ताले गुमाएका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।